ევროკავშირის სადამკვირვებლო მისია საქართველოში(EUMM) ადასტურებს, რომ გორის რაიონში ე.წ. მესაზღვრეების მიერ გატაცებული არასრულწლოვანი გათავისუფლებულია. ამის შესახებ EUMM განცხადებას ავრცელებს.

მათი ინფორმაციით, ადგილობრივი 16 სექტემბერს, გდულეთთან ახლოს დააკავეს, ე.წ. საზღვრის უკანონო კვეთის ბრალდებით.

გატაცებული 17 წლისა სკოლის მოსწავლეა. მისი დედის თქმით, მისმა შვილმა სასწავლებლიდან სახლში დაბრუნება დააგვიანა:

"როდესაც ტელეფონზე დავურეკე, რუსულად მიპასუხეს და მის ასაკს მეკითხებოდნენ, რომ ვიკითხე სად იყო ჩემი შვილი, დამარცვლით მიპასუხეს რომ წინაგარში იყო. ახლა როგორც ვიცით უკვე ცხინვალში ჰყავთ გადაყვანილი".

სადამკვირვებლო მისია საქართველოში წერს, რომ 17 წლის არასრულწლოვანი, ინფორმაციის გაცვლისა და ორმხრივი დიალოგის შემდეგ გაათავისუფლეს.