საპარლამენტო უმრავლესობის წევრი, ზაზა ხუციშვილი ერთ-ერთია, რომელმაც კანონიდან "სექსუალური ორიენტაციისა" და "გენდერული იდენტობის" ამოღებას მხარი დაუჭირა. დეპუტატი ამბობს, რომ ღილაკი აერია და კვიციანის კანონზე "შემთხვევით" დაეჭირა.

"თვითონ პაკეტი იყო 8 კანონისგან შემდგარი და შემთხვევით მოხდა, შემთხვევით დამეჭირა", — აღნიშნა ხუციშვილმა On.ge-სთან საუბრისას.

საქართველოს პარლამენტმა პირველი მოსმენით პატრიოტთა ალიანსის წევრის, ემზარ კვიციანის კანონპროექტს, ანტიდისკრიმინაციული კანონიდან ტერმინების "სექსუალური ორიენტაციისა" და "გენდერული იდენტობის" ამოღებას მხარი არ დაუჭირა. კანონპროექტს მხარი 27-მა დეპუტატმა დაუჭირა მხარი, წინააღმდეგი იყო 13, თუმცა კვორუმისთვის 63 დეპუტატის ხმა იყო საჭირო.

ეს პირველი შემთხვევა არაა, როცა უმრავლესობის დეპუტატებს ხმის მიცემის დროს ღილაკი "აერიათ". ამავე მიზეზით უმრავლესობამ თანამდებობიდან ვერ გადააყენა ყოფილი თანაპარტიელი ზვიად კვაჭანტირაძე.