"დროა, ვიბრძოლოთ, რომ აღარ ვიგლოვოთ", — ამ ლოზუნგით ხვალ, პირველ აპრილს 19 საათზე სოლიდარობის ქსელმა მთავრობის კანცელარიასთან აქცია დაგეგმა. აქციის ორგანიზატორები ამ პროტესტით ეხმაურებიან დღეს, 31 მარტს თბილისში, ჭავჭავაძის გამზირზე მომხდარ უბედურ შემთხვევას, რა დროსაც ჩამოშლილმა მიწამ მუშები მოიყოლა.

"დღეს, 31 მარტია, კვირა დღე და თბილისში ბიზნესის ინტერესებს კიდევ ადამიანების სიცოცხლე ეწირება. რისთვის შრომობენ ადამიანები? რომ ერთ დღეს სამსახურში მიწამ ჩაიტანოთ და სიცოცხლე ასე დაასრულონ?

ეს არ არის ინდიფერენტულობა, ეს არ არის უბედური შემთხვევა, ეს არის ადამიანების წამება! ეს უნდა დასრულდეს! უკვე ინდივიდუალურად და კოლექტიურადაც უნდა გვაწუხებდეს ასეთი ამბების მხოლოდ პოსტად გაზიარება და მივიწყება", — ნათქვამია აქციის ორგანიზატორების განცხადებაში.

შემთხვევა დღეს საღამოს, 31 მარტს მოხდა ვაკეში, ჭავჭავაძის გამზირზე მიმდინარე მშენებლობისას. მერიის წარმომადგენელმა, გიორგი ბაგრატიონმა ჟურნალისტებს უთხრა, რომ მიწა ნაგებობის საძირკველის გამაგრების დროს ჩამოიშალა. დაახლოებით ერთი საათის წინ 26 წლის მუშის ცხედარი გადაასვენეს პროზექტურაში, მეორეს კი ჯერ კიდევ ეძებენ.