ორგანიზაცია სამართლიანი არჩევნების ხელმძღვანელი, მიხეილ ბენიძე On.ge-სთან საუბარში განმარტავს, რომ თავისი შინაარსით ბიძინა ივანიშვილის განცხადება სოფელ ხიბულაში ამომრჩევლის მოსყიდვად შეიძლება ჩაითვალოს. ის იქვე აღნიშნავს, რომ ფორმალურად, კანონდარღვევად შესაძლოა ვერ განისაზღვროს, ვინაიდან ხიბულა ზუგდიდის მუნიციპალიტეტში არ შედის, ივანიშვილის იქ ჩასვლის დღეს კი არჩევნების თარიღი ჩანიშნული არ იყო.

"როდესაც საარჩევნო პერიოდში რაიმე სერვისის შეთავაზება ან მატერიალური ღირებულების პროექტის განხორციელება ხდება კერძო პირის, ამ შემთხვევაში პარტიის წარმომადგენლის მხრიდან, ეს ჩაითვლება ამომრჩევლის მოსყიდვად. თავისი შინაარსით ეს არის მოსყიდვა. ამას არეგულირებს საარჩევნო კოდექსის 47-ე მუხლი და სხვა კანონებიც. ცალკე საკითხია, ამის მიღმა, ფორმალურად, შეიძლება თუ არა ეს კლასიფიცირდეს, როგორც დარღვევა. ერთის მხრივ საარჩევნო პერიოდი, უშუალოდ ზუგდიდის მუნიციპალიტეტში ჯერ დაწყებული არ ყოფილა, როცა სოფელ ხიბულაში განცხადება გააჟღერა [ბიძინა ივანიშვილმა] და მეორე — სოფელი ხიბულა არ არის ზუგდიდის მუნიციპალიტეტში", — ამბობს მიხეილ ბენიძე და განმარტავს, რომ ეს სამართლებრივი ინტერპრეტაციის და დისკუსიის საგანია და საარჩევნო კოდექსი არ ასხვავებს შუალედურ და ეროვნულ არჩევნებს:

"ის, რაც საარჩევნო კოდექსში წერია, შეიძლება ისეც განიმარტოს, რომ შუალედური არჩევნების წინასაარჩევნო პერიოდი არ ეხება მხოლოდ იმ მუნიციპალიტეტებს, არამედ, სხვა მუნიციპალიტეტებსაც".

ბენიძე ამბობს, რომ ზუგდიდის მიმდებარედ ყოფილი პრეზიდენტის საკითხის წამოწევა ამომრჩევლის გულის მოგების მიზნით გადადგმული ნაბიჯია და ის კანონის სულისკვეთებას ეწინააღმდეგება:

"ვიცით რომ ის [ზვიად გამსახურდია] სწორედ სამეგრელოდან იყო და მხარდამჭერთა დიდი რაოდენობა დღესაც ჰყავს, მისი იდეების ერთგულნი არიან".

29 მარტს, ქართულო ოცნების თავმჯდომარე, ბიძინა ივანიშვილი სამეგრელოს სოფელ ხიბულაში, სადაც გამსახურდიამ სიცოცხლის ბოლო წლები გაატარა, მოსახლეობას პრობლემების მოგვარებას დაჰპირდა. მან თქვა, რომ ბიუჯეტში თანხის არარსებობის შემთხვევაში ამ საკითხს საკუთარი ხარჯებით მოაგვარებს:

"გაზიფიცირებაც დავაჩქაროთ, წყლის საკითხიც დავაჩქაროთ. ბიუჯეტს არ ექნება, [ფული] მე გავაკეთებ".

სოფელ ხიბულაში ვიზიტამდე ბიძინა ივანიშვილმა ზვიად გამსახურდიას იუბილესთან დაკავშირებით წერილი გაავრცელა, სადაც წერდა, რომ ქვეყნის სირცხვილია პირველი პრეზიდენტის მკვლელობის საქმის გამოუძიებლობა.

ბიძინა ივანიშვილის სამეგრელოში ჩასვლის დღეს ცესკოს მერების რიგგარეშე არჩევნების თარიღი ჯერ ჩანიშნული არ ჰქონდა. გამოცხადებული იყო მხოლოდ პარლამენტის შუალედური არჩევნები თბილისში, მთაწმინდის ოლქში.

30 მარტის სხდომის შედეგად გადაწყდა, რომ 19 მაისს გაიმართება, როგორც პარლამენტის შუალედური, ისე 5 მუნიციპალიტეტის მერების რიგგარეშე არჩევნები. ორგანიზაცია სამართლიანი არჩევნების ხელმძღვანელის თქმით, 31 მარტიდან ყველა საჯარო განცხადება, სადაც მოსყიდვის ნიშნები იქნება, შესაბამისად კლასიფიცირდება.