საქართველოს ჭიდაობის ეროვნული ფედერაციაში აცხადებენ, რომ თუკი მოჭიდავე ზურაბ დათუნაშვილი მსოფლიო ჭიდაობის წესდებას დაარღვევს და სხვა ქვეყნის ნაკრებში გადავა, სანქციას დააწესებს მსოფლიოს ჭიდაობის გაერთიანება და არა საქართველოს ჭიდაობის ეროვნული ფედერაცია.

ფედერაცია უარყოფს, დათუნაშვილის ინფორმაციას, რომ მას სხვა ქვეყნის სახელით ასპარეზობის უფლება ფედერაციამ არ მისცა. მათივე ცნობით, ჭიდაობის ეროვნულ ფედერაციას დათუნაშვილის გაშვება-არგაშვების თემაზე არ უმსჯელია და არც მისთვის უცნობებია რამე.

გავრცელებულ განცხადებაში მოყვანილია მსოფლიო ჭიდაობის გაერთიანების წესდება, რომ თუ ერთი ქვეყნის ნაკრების წევრი თვითნებურად გადაწყვეტს სხვა ქვეყნის ნაკრებში გადასვლას, ისჯება ორწლიანი დისკვალიფიკაციით.

მოჭიდავე ზურაბ დათუნაშვილი აცხადებს, რომ ჭიდაობის ფედერაცია კარიერის დასრულებას აიძულებს. მისი თქმით, პრეზიდიუმის სხდომის შემდეგ ფედერაციისგან მიიღო პასუხი, რომ სხვა ქვეყნის სახელით ასპარეზობის უფლება არ მიეცემა:

"მოჭიდავის სპორტული კარიერისთვის ორი წელი არის საკმაოდ დიდი პერიოდი და ამ ხნის გაცდენის შემდეგ პროფესიონალურ სპორტში დაბრუნება, ფაქტობრივად, შეუძლებელია... თითქმის 22 წელია ამ სპორტში ვარ და მის გარეშე ცხოვრება ვერც წარმომიდგენია, თუმცა ახლა, 27 წლის ასაკში, დავდექი ამ მოცემულობის წინაშე — იძულებული გამხადეს კარიერის დასრულებაზე ვიფიქრო".

მოჭიდავე ზურაბ დათუნაშვილი გეგა გეგეშიძეს ძალადობაში ადანაშაულებს და მის გადადგომას ითხოვს. თებერვლის დასაწყისში სპორტსმენმა განაცხადა, რომ არჩევანის წინაშე დგას ან კარიერა დაასრულოს, ან სხვა ქვეყნის სახელით იასპარეზოს. პრეზიდიუმის სხდომის შემდეგ დათუნაშვილმა თქვა, რომ გეგა გეგეშიძესთან შერიგება ურჩიეს და მისი ფედერაციიდან წასვლის შესახებ საუბარი არ ყოფილა. ფედერაციის წარმომადგენლებმა განაცხადეს, რომ ზურაბ დათუნაშვილს ნაკრებიდან წასვლა და სხვა ქვეყნის სახელით ასპარეზობა სურს, რის უფლებასაც ვერ მისცემდნენ.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.