GLAAD-ის მედია დაჯილდოებაზე ამერიკელ შემსრულებლებს, ბიონსესა და ჯეი-ზის საპატიო ჯილდო გადასცეს.

წყვილმა მისი მიღებისას შთამბეჭდავი სიტყვა წარმოსთქვა და აღნიშნა, რომ საზოგადოებაში არსებული სტიგმების წინააღმდეგ ბრძოლას აგრძელებს.

"სტიგმის ქვეშ არიან შავკანიანების ოჯახებში მყოფი ქვიარი კაცები და ქალები", - თქვა ბიონსემ.

წყვილმა ასევე აღნიშნა ოჯახის ლგბტქი თემის წარმომადგენელი წევრების გავლენა მათზე.

ჯეი-ზიმ გაიხსენა დედა, გლორია კარტერი, რომელიც ლესბოსელია. მისი სიტყვები, რომელიც ჩრდილში ცხოვრებას ეხება, ჯეი-ზის ალბომში შესულ სიმღერაში Smile ისმის.

"მე საშუალება მომეცა გავყოლოდი მის ნაბიჯებს და გამევრცელებინა სიყვარული და მიმღებლობა, მას შემდეგ, რაც ჩემი სიმღერა ლამაზი სიტყვებით დაასრულა", - თქვა რეპერმა დედის შესახებ.

რაც შეეხება ბიონსეს, მან ჯილდო თავის დიდ ბიძას, ჯონის მიუძღვნა, რომელიც ასევე ჰომოსექსუალი იყო.

"მან სიმართლეში იცხოვრა. ის იყო ძლიერი, მამაცი და სამყაროს ბოდიშებს არ უხდიდა, იმ დროს, როცა ქვეყანას მისი მიღება არ სურდა".

ბიონსემ ასევე გაიხსენა ბიძა ჯონის ბრძოლა შიდსთან და თქვა, რომ ეს მისი ცხოვრების ყველაზე მტკივნეული გამოცდილება იყო.

"ლგბტქი უფლებები ადამიანის უფლებებია. ადამიანის უფლებაა, უყვარდეს ის, ვინც აირჩია. როგორ აღიქვამ საკუთარ თავსა და იდენტობას, ასევე ადამიანის უფლებაა", - დასძინა მეგავარსკვლავმა.

GLAAD-ის მედია დაჯილდოება პირველად 1990 წელს გაიმართა. მასზე ლგბტქი ადამიანების დაცვისთვის და ასევე სამართლიანი წარდგენისთვის აჯილდოებენ.