ქართული ოცნების თავმჯდომარე, ბიძინა ივანიშვილი ზვიად გამსახურდიას 80 წლის იუბილეს გამოეხმაურა და აღნიშნა, რომ საქართველოს პირველი პრეზიდენტის დაღუპვის გარემოებები დღემდე გამოუძიებელია, რაც "ქვეყნის დიდი სირცხვილია". მისივე თქმით, საქმე დროულად უნდა მივიდეს ბოლომდე და ყველაფერს დაერქვას თავისი სახელი.

"ჩვენ პატივი უნდა მივაგოთ ჩვენს გმირებს და ამასთანავე სათანადო დასკვნები გამოვიტანოთ წარსულიდან, რათა შევძლოთ, პირნათლად გავუსწოროთ თვალი მომავალს — 31 მარტი არის დაბადების დღე დამოუკიდებელი საქართველოს პირველი პრეზიდენტის, რომელიც შეეწირა დამოუკიდებლობისთვის ბრძოლას და რომლის საქმემაც გაიმარჯვა!" — ნათქვამია ბიძინა ივანიშვილის მიერ გავრცელებულ წერილში.

ბიძინა ივანიშვილი დღეს სამეგრელოში სოფელ ხიბულაშიც ჩავიდა, სადაც ზვიად გამსახურდიამ სიცოცხლის უკანასკნელი დღეები გაატარა.

ზვიად გამსახურდიას საქმე

ზვიად გამსახურდიას გარდაცვალების საქმეზე 2018 წლის 31 დეკემბერს 25 წლიანი ხანდაზმულობის ვადა გავიდა. დეკემბრის ბოლოს პარლამენტის თავმჯდომარემ, ირაკლი კობახიძემ განაცხადა, რომ ხანდაზმულობის ვადის გახანგრძლივებისთვის დაჩქარებულად იმსჯელებდნენ.

ზვიად გამსახურდიას მკვლელობის საქმეზე შეიქმნა საგამოძიებო ჯგუფი, რომელსაც გენერალური პროკურორი, შალვა თადუმაძე უხელმძღვანელებს.

საქართველოს პირველი პრეზიდენტი 1993 წლის 31 დეკემბერს სამეგრელოს სოფელ ძველ ხიბულაში გარდაცვლილი იპოვეს. ედუარდ შევარდნაძის მმართველობის პერიოდში, 1994 წელს გამოძიება თვითმკვლელობის მუხლით დაიწყო. 2015 წელს საქართველოს მთავარმა პროკურატურამ საქმის გამოძიება განზრახ მკვლელობის მუხლით გადააკვალიფიცირა.

2009-2011 წლებში საქართველოს პარლამენტში ზვიად გამსახურდიას გარდაცვალების საქმეზე იმუშავა დროებითმა სპეციალურმა კომისიამ, რომელსაც დეპუტატი კონსტანტინე გამსახურდია ხელმძღვანელობდა. კომისიის მუშაობის დასრულების შემდეგ პარლამენტმა მიიღო დადგენილება, რომლითაც მიმართავდა მთავარ პროკურატურას "სათანადო რეაგირება" მოეხდინა საქმეზე გამოვლენილ "ახალ ფაქტებსა და გარემოებებზე". გამსახურდიას ოჯახმა 2014 წელს მიმართა საქართველოს მთავრობას საქმის გამოძიების დასრულების თხოვნით.