ირაკლი კობახიძის განცხადებით, პირველი პრეზიდენტის, ზვიად გამსახურდიას გარდაცვალების საქმის ხანდაზმულობის ვადის გაზრდაზე პარლამენტი კანონს დაჩქარებული წესით მიიღებს.

პარლამენტის თავმჯდომარემ ამის შესახებ განცხადება გაავრცელა, სადაც წერს, რომ მათ გაითვალისწინეს ზვიად გამსახურდიას ოჯახის მოთხოვნა, ამ საკითხთან დაკავშირებით.

კობახიძის თქმით, მათ მიიღეს გადაწყვეტილება და პარლამენტში წარდგენილია კანონპროექტი, რომელიც ხანდაზმულობის ვადის გაზრდას ითვალისწინებს.

იურიდიულ საკითხთა კომიტეტის თავმჯდომარის, ეკა ბესელიას თქმით, ვადის გაგრძელება შეეხება ყველა იმ საქმეს, რომელიც მოექცევა განსაკუთრებით მძიმე დანაშაულის კატეგორიაში. ცვლილებები შევა სისხლის სამართლის კოდექსში, რომელსაც მომდევნო კვირაში დაამტკიცებენ.

დეპუტატი მამუკა მდინარაძე მიიჩნევს, რომ სახელმწიფოს აქვს "მორალური ვალდებულება", გამოიძიოს ზვიად გამსახურდიას საქმე.

ერთი დღით ადრე, 21 დეკემბერს ახლადარჩეულმა პრეზიდენტმა, სალომე ზურაბიშვილმა მოუწოდა საკანონმდებლო ორგანოს, ზვიად გამსახურდიას მკვლელობის გამოძიების ხანდაზმულობის ვადის გასაგრძელებლად კანონში ცვლილება შესულიყო.

14 დეკემბერს საქართველოს პირველი პრეზიდენტის, ზვიად გამსახურდიას შვილებმა კონსტანტინე და ცოტნე გამსახურდიებმა ზვიად გამსახურდიას საქმის გამოძიებისა და დამნაშავის დასჯის მოთხოვნით პროკურატურასთან შიმშილობა დაიწყეს.

ზვიად გამსახურდიას საქმე

ზვიად გამსახურდიას გარდაცვალების საქმეზე 2018 წლის 31 დეკემბერს 25 წლიანი ხანდაზმულობის ვადა გადის და საქმე დაიხურება. საქართველოს პირველი პრეზიდენტი 1993 წლის 31 დეკემბერს სამეგრელოს სოფელ ძველ ხიბულაში გარდაცვლილი იპოვეს.

ედუარდ შევარდნაძის მმართველობის პერიოდში, 1994 წელს გამოძიება თვითმკვლელობის მუხლით დაიწყო. 2015 წელს საქართველოს მთავარმა პროკურატურამ საქმის გამოძიება განზრახ მკვლელობის მუხლით გადააკვალიფიცირა.

2009-2011 წლებში საქართველოს პარლამენტში ზვიად გამსახურდიას გარდაცვალების საქმეზე იმუშავა დროებითმა სპეციალურმა კომისიამ, რომელსაც დეპუტატი კონსტანტინე გამსახურდია ხელმძღვანელობდა. კომისიის მუშაობის დასრულების შემდეგ პარლამენტმა მიიღო დადგენილება, რომლითაც მიმართავდა მთავარ პროკურატურას "სათანადო რეაგირება" მოეხდინა საქმეზე გამოვლენილ "ახალ ფაქტებსა და გარემოებებზე". გამსახურდიას ოჯახმა 2014 წელს მიმართა საქართველოს მთავრობას საქმის გამოძიების დასრულების თხოვნით.