საქართველოს თანაინვესტირების ფონდი არ ადასტურებს, რომ შვედური ბრენდი H&M საქართველოს ბაზარზე შემოდის. საზოგადოებასთან ურთიერთობის სამსახურმა On.ge-სთან საუბარში განმარტა, რომ მათ ბევრ საერთაშორისო ბრენდთან აქვთ მოლაპარაკება, თუმცა ის თუ რომელი ბრენდების შემოყვანას გეგმავენ კონფიდენცუალურია:

"ბევრ პოტენციურ ბრენდთან არის მოლაპარაკებები ორმხრივად, რომელიც კონფიდენციალურად მიმდინარეობს. ამ კონფიდენციალობას ყოველთვის მოვითხოვთ როგორც ჩვენ, ასევე პოტენციური რითეილერიც. ვერაფერს დაგიდასტურებთ, რადგან როგორც კი რითეილერთან ხელშეკრულებას ხელი მოეწერება იგი გასაჯაროვდება. ამჟამად, H&M-ის შემოსვლას ჩვენ არ ვადასტურებთ".

თანაინვესტირების ფონდის პროექტია სავაჭრო ცენტრი გალერეა თბილისი. დღეს, 15 სექტემბერს, ერთ-ერთმა ინტერნეტ გამოცემამ გაავრცელა ინფორმაცია, რომ ქართულ ბაზარზე მსოფლიო ბრენდი H&M შემოდის და რომ იგი გალერია თბილისის სავაჭრო ცენტრში გაიხსნება.