საქართველოში ამერიკის საელჩომ დღეს თავის ფეისბუკზე მწვანე ბარათის გათამაშებასთან დაკავშირებით დაინტერესებული მოქალაქეების კითხვებს უპასუხა და სარეგისტრაციო თარიღები დაასახელა.

Green Card-ის გათამაშებაში მონაწილეებისთვის რეგისტრაცია 4 ოქტომბერს, 20:00 საათზე დაიწყება და 7 ნოემბერს დასრულდება.

რეგისტრაცია მხოლოდ ამერიკის სახელმწიფო დეპარტამენტის საიტზეა შესაძლებელი. საკონსულო გათამაშებაში მონაწილეობის მსურველთათვის რიგ რეკომენდაციებს ავრცელებს.

რეგისტრაციის დასრულებისას მნიშვნელოვანია აპლიკანტმა შეინახოს დასტურის ნომერი, რომელიც გამოჩნდება აპლიკაციის ვებ-გვერდზე. აღნიშნული ნომრის გამოყენებით მონაწილე მომავალში სტატუსს გადაამოწმებს.

Green Card-ის მონაცემებით, 2016 წელს საქართველოდან მწვანე ბარათი 680-მა მოქალაქემ მოიგო, რაც მათ ამერიკის შეერთებულ შტატებში რამდენიმე წლით ცხოვრების, სწავლის და მუშაობის უფლებას აძლევს.