უკრაინის შინაგან საქმეთა მინისტრმა, არსენ ავაკოვმა განაცხადა, რომ სააკაშვილის გეგმები უკრაინაში დაბრუნების შესახებ "პირველი აპრილისთვის 300 დოლარად დაგეგმილი პიარია". მისი თქმით, სააკაშვილი არათუ ქვეყანაში ვერ შევა, თვითმფრინავშიც კი ვერ დაჯდება უკრაინის მიმართულებით. ამის შესახებ ავაკოვმა დიმიტრი გორდონთან ინტერვიუში ისაუბრა.

ჟურნალისტმა მინისტრს გაახსენა 2017 წელს განვითარებული მოვლენები, როცა სააკაშვილმა მომხრეებთან ერთად გადაკვეთა უკრაინის საზღვარი. ავაკოვმა განაცხადა, რომ მსგავსი შემთხვევა აღარ განმეორდება, რადგან შესაბამისი ზომები მიიღეს. როგორც მან განმარტა 2017 წელს ჰქონდათ არჩევანი დაეწყოთ სროლა და დაეძაბათ სიტუაცია საზღვართან ან მიეცათ სააკაშვილისთვის შესვლის უფლება და შემდეგ კანონის გზით დაესაჯათ ყველა მონაწილე, რაც გააკეთეს კიდეც.

ავაკოვმა, რომელიც სააკაშვილის უკრაინაში ყოფნის პერიოდში მასთან ღია დაპირისპირებაში იყო განაცხადა, რომ ოდესის ყოფილი გუბერნატორი უკრაინაში არაკორექტულად იქცეოდა. მისი თქმით, არ სურს იგივე მომავალი უკრაინისთვის, რაც სააკაშვილმა საქართველოს დაუტოვა.

12 მარტს გორდონთან ინტერვიუში სააკაშვილმა განაცხადა, რომ მან უკვე იყიდა ვარშავიდან უკრაინაში დასაბრუნებელი ბილეთი. მისი თქმით, უკრაინის საპრეზიდენტო არჩევნების პირველი ტურის მეორე დღეს, პირველ აპრილს დაბრუნდება, რადგან პოროშენკოს არჩევნებში გამარჯვების შანსი არ აქვს.

"როგორც კი ის მეორე ტურში ვერ გადავა, დარწმუნებული ვარ, რომ არც ერთ მესაზღვრეს არ მოუნდება შეასრულოს მისი ბრძანება ქვეყანაში ჩემს არშეშვებასთან დაკავშირებით", — განაცხადა სააკაშვილმა.

2017 წელს პრეზიდენტმა პეტრო პოროშენკომ მიხეილ სააკაშვილს უკრაინის მოქალაქეობა ჩამოართვა. სააკაშვილმა ლტოლვილის სტატუსი მინიჭება არაერთხელ ითხოვა და სასამართლოშიც იჩივლა, თუმცა უშედეგოდ.

2018 წლის 12 თებერვალს სამართალდამცავებმა ოდესის ყოფილი გუბერნატორი კიევის რესტორანში დააკავეს და პოლონეთში დააბრუნეს. უკრაინაში შესვლა მას 2021 წლის 13 თებერვლამდე აქვს აკრძალული.