უზენაეს სასამართლოში მოსამართლეების შერჩევის შესახებ ევროპული საქართველოს კანონპროექტს იურიდიულ საკითხთა კომიტეტმა მხარი არ დაუჭირა. ამასთანავე, კომიტეტმა მხარი არ დაუჭირა იუსტიციის უზენაესი საბჭოს არამოსამართლე წევრების ანა დოლიძისა და ნაზი ჯანეზაშვილი საკანონმდებლო წინადადებას.

სხდომაზე არ განუხილავთ ეკა ბესელიასა და სხვა დეპუტატების კანონპროექტი, რადგან მომხსენებლები, ბესელია და გედევან ფოფხაძე სხდომას არ დაესწრნენ.

ევროპული საქართველოს კანონპროექტის განხილვა კამათის ფონზე წარიმართა. უმრავლესობის დეპუტატმა, მამუკა მდინარაძემ რამდენჯერმე თქვა, რომ პროექტი "სულელურია".

პროექტის მიხედვით, იუსტიციის უმაღლესი საბჭოს წევრს უფლება ექნება, რომ მოსამართლეობის კანდიდატი დაასახელოს და თუ ის კრიტერიუმებს აკმაყოფილებს, პარლამენტში წარსადგენ სიაში ავტომატურად მოხვდება. ამავე დროს, საბჭოს უფლება ექნება, რომ უარი თქვას რომელიმე კანდიდატის წარდგენაზე, ოღონდ გადაწყვეტილების მისაღებად აუცილებელი იქნება სრული კონსენსუსი.

რაც შეეხება ჯანეზაშვილისა და დოლიძის საკანონმდებლო წინადადებას, ის ხუთ ძირითად პრინციპს მოიცავს:

  • საკონსულტაციო ჯგუფის შექმნას;
  • მოსამართლეობის კანდიდატურების შესარჩევი კონკურსის გამოცხადება;
  • ინტერესთა კონფლიქტის თავიდან აცილებას;
  • გასაუბრების ღიად ჩატარებას;
  • გადაწყვეტილების კონსესუსით მიღებას.