იუსტიციის მინისტრი, თეა წულუკიანი თანამდებობის დატოვებას არ გამორიცხავს. ამის შესახებ წულუკიანი დღეს, 2019 წლის 11 მარტს ჟურნალისტებს ესაუბრა.

წულუკიანი განმარტავს, რომ არ გადამდგარა და აქვე აკონკრეტებს, რომ არსებობს ოთხი-ხუთი დღის წინ გაჩენილი საკითხი, რომელიც მისი სამინისტროს უფლებამოსილების ფარგლებში უნდა გადაწყდეს. მისი თქმით, ამ თემაზე დისკუსია მიმდინარეობს და მას ძალიან მყარი პოზიცია აქვს.

"ეს არის საკითხი, რომელიც მე ვთვლი, რომ არის ჩემს თვალში, ყოველ შემთხვევაში, ძალიან მასშტაბური, მნიშვნელოვანი ჩემთვის და თუ ვნახე, რომ ეს პოზიცია არ იქნება გაზიარებული, ფასეულობათა შორის წინააღმდეგობა იქნება, მე, რა თქმა უნდა, არ ვიფიქრებ არც ერთ წუთს და გვერდზე გავიწევი იმიტომ, რომ თანამდებობა არ არის ფასეული", — თქვა წულუკიანმა.

ბოლო რამდენიმე დღეა მედიაში აქტიურად ვრცელდებოდა ინფორმაცია იმის შესახებ, რომ იუსტიციის მინისტრი თანამდებობის დატოვებას გეგმავდა. თეა წულუკიანი იუსტიციის მინისტრის პოსტს ხელისუფლებაში ქართული ოცნების მოსვლიდან იკავებს.