თბილისის საქალაქო სასამართლომ ტელეკომპანია იბერიას 18 ჟურნალისტისთვის ხელფასისა და კომპენსაციის გადახდა დააკისრა. სასამართლოში მათ ინტერესებს საქართველოს ახალგაზრდა იურისტთა ასოციაცია იცავდა.

საიას ინფორმაციით, იბერიამ ჟურნალისტებს უნდა აუნაზღაუროს ორი თვის შრომის ოდენობის კომპენსაცია, ერთი კვირის სახელფასო დავალიანება და მასზე დარიცხული პირგასამტეხლო, თითოეულ ვადაგადაცილებულ დღეზე 0,07%-ის ოდენობით.

ფინანსური პრობლემების მიზეზით ტელეკომპანია იბერიამ საინფორმაციო პროგრამები 16 ოქტომბერს შეაჩერა. ტელეკომპანია ხელისუფლების მხრიდან ფინანსურ ზეწოლაზე საუბრობდა, რასაც ომეგა ჯგუფის საქმესთან აკავშირებდნენ.

საინფორმაციო პროგრამების დახურვიდან რამდენიმე დღეში ტელეკომპანიის მოქმედმა და ყოფილმა თანამშრომლებმა არხის შენობის წინ საპროტესტო აქცია გამართეს და ხელფასისა და კომპენსაციის ანაზღაურება მოითხოვეს.