"განათლების სფეროში მიმართული დაფინანსება ყოველწლიურად გაიზრდება და მაქსიმუმს მიაღწევს 2022 წლისთვის, როცა ჩვენ გავალთ მთლიანი შიდა პროდუქტის 6%-იან ნიშნულზე, რაც ქვეყნის ბიუჯეტის მეოთხედა", — აღნიშნული სამთავრობო ინიციატივა პრემიერმა მამუკა ბახტაძემ დღეს, 7 მარტს წარადგინა. მისივე თქმით, ინიციატივა მიმართულია "სამაგალითო განათლების, ქართული სკოლის დასაფუძნებლად".

ბახტაძის განმარტებით, ეს იქნება უზრუნველყოფილი სპეციალური კანონონმდებლობით — საგანმანათლებლო თანასწორობის აქტით, რომელიც მთავრობებს ათწლეულების განმავლობაში დაავალდებულებს, რომ ამ მასშტაბის ინვესტიცია განახორციელოს განათლების სექტორში ყოველწლიურად:

"უფრო მეტიც, სახელმწიფოს მხრიდან ბიუჯეტის მეოთხედის ინვესტირება განათლებაში, კერძო სექტორის მხრიდანაც გამოიწვევს ამ მიმართულებით ინვესტიციების ზრდას, რაც ნიშნავს იმას, რომ სწორედ განათლების სექტორი გახდება ჩვენი ეკონომიკის დომინანტი სექტორი და მიაღწევს 10-11 პროცენტიან წილს".

მისივე თქმით, განათლების რეფორმის ფარგლებში პედაგოგის პროფესია ერთ-ერთ მაღალანაზღაურებადი გახდება.