შინაგან საქმეთა მინისტრმა, გიორგი გახარიამ განაცხადა, რომ ანაკლიის პორტის ქვეყნის ეკონომიკისთვისა და უსაფრთხოებისთვის მნიშვნელოვანია. მისივე თქმით, "სკანდალებითა და შეთქმულების თეორიებით" ადამიანები ცდილობენ, ვალდებულებებს გაექცნენ და ქვეყნის ინტერესები დააზიანონ.

"არავის არ გამოუვა, არც ერთ შემთხვევაში, რომ შეთქმულების თეორიებით, სკანდალებითა და ჭორაობით, თავი აარიდონ ვალდებულებებს, რომელიც წლების წინ აქვთ აღებული", — განაცხადა გახარიამ.

ის კიდევ ერთხელ გამოეხმაურა თიბისი ბანკის დამფუძნებლის, მამუკა ხაზარაძის განცხადებას და აღნიშნა, რომ პარლამენტის ტრიბუნა "ჭორაობისთვისა და ტყუილებისთვის" გამოიყენეს:

"ამას რა თქმა უნდა თავისი მიზანი ჰქონდა. ნათელია, რომ ამის მიზანი იყო შინაარსობრივი საუბრიდან აქცენტების გადატანა რაღაც სკანდალებზე და, სამწუხაროდ, ეს გამოვიდა".

4 მარტს პარლამენტში თიბისის დამფუძნებლებს, მამუკა ხაზარაძესა და ბადრი ჯაფარიძეს მოუსმინეს. ამ სხდომაზე მამუკა ხაზარაძემ განაცხადა, რომ არჩევნების წინ მაღალჩინოსანმა წერილი მისწერა, რომლის მიხედვითაც მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყნისა და საერთაშორისო ასპარეზზე.

შემდგომში ხაზარაძემ განმარტა, რომ ეს წერილი გახარიასგან მიიღო. ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. აღნიშნულ განცხადებას გიორგი გახარიამ "პრივილეგირებული კაცის ჭორაობა" უწოდა.

სავარაუდო მუქარის წერილთან დაკავშირებით ხაზარაძე 5 მარტს თბილისის საქალაქო სასამართლოში გამოკითხვაზე იმყოფებოდა. როგორც მან განაცხადა, სასამართლოში წერილის ასლი წარადგინა, ორიგინალი კი, ლონდონში ექსპერტიზაზე გაგზავნა. პროკურატურა კი აცხადებს, რომ ხაზარაძემ "ჩვეულებრივ ფურცელზე", კომპიუტერში დაბეჭდილი ტექსტი წარადგინა, რომლის შედგენაც მისივე თქმით, ნებისმიერ ადამიანს შეუძლია. პროკურორმა განმარტა, რომ ამ ფურცელზე მაიდენტიფიცირებელი ნიშანი არ იყო.