ფრაქცია ქართული ოცნების თავმჯდომარე მამუკა მდინარაძე აცხადებს, რომ თიბისი ბანკის დამფუძნებლის, მამუკა ხაზარაძისგან ვერ მიიღეს საკმარისი ინფორმაცია შინაგან საქმეთა მინისტრის, გიორგი გახარიას მხრიდან სავარაუდო მუქარის წერილზე. მისი თქმით, ხაზარაძემ თავი შეიკავა დეტალებზე საუბრისგან და მეტი კითხვის ნიშნები გააჩინა.

"როდესაც განმცხადებელი ამბობს, რომ იყო მუქარის შემცველი წერილი კონკრეტული პირისგან, მან უნდა დაასახელოს დრო, ადგილი, საშუალება და შინაარსი. როდესაც ამაზე თავს იკავებს, მეტი კითხვის ნიშნები ჩნდება. როგორც მინიმუმ, მე ვფიქრობ, რომ მამუკა ხაზარაძეს დღეს უნდა დაესახელებინა შინაარსი ან, უბრალოდ, წარმოედგინა ეს წერილი", — განაცხადა მდინარაძემ.

მისი თქმით, ხაზარაძემ ამ თემაზე პროკურატურებთანაც ბუნდოვნად ისაუბრა და ის მიგნებებიც კი არ გაუმხელია, რაც დღეს პარლამენტს აცნობა. მისივე თქმით, პასუხგაუცემელი დარჩა კითხვა იმაზეც, რატომ არ წარადგინა ასეთი წერილი პროკურატურაში დღემდე.

"რატომ გვიწევს ჩვენ სიტყვა სავარაუდოს ხსენება მაშინ, როცა დღეს იყო თავისუფლად საშუალება იმისა, რომ მთლიანად, დეტალურად გვემსჯელა ამ საკითხზე, იყო თუ არა მართლა ასეთი წერილი", — განაცხადა მდინარაძემ. მისივე თქმით, ამ თემის მთავარი საქმე გადაიფარა.

დღეს, 4 მარტს პარლამენტში თიბისის დამფუძნებლებს უსმენდნენ. ამ სხდომაზე მამუკა ხაზარაძემ განაცხადა, რომ არჩევნების წინ გიორგი გახარიამ მუქარის წერილი მიწერა, რომლის მიხედვითაც მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

ბიზნესმენმა აღნიშნა, რომ აღნიშნულთან დაკავშირებით პროკურატურა ინფორმირებული იყო. მისი თქმით, ამის შესახებ სასამართლო წესით დაკითხვაზე განაცხადა, რომელსაც სამი პროკურორი ესწრებოდა. მისი თქმით, დეპუტატებს ამაში დასარწმუნებლად შეუძლიათ დაკითხვის ოქმი ნახონ.

"საოცრება ის არის, რომ მე ამის შესახებ ჩემი დაკითხვის ოქმში ვთქვი და ამის მერე არც მოსამართლემ, არც სამმა პროკურორმა კითხვაც კი არ დამისვა", — განაცხადა ხაზარაძემ.

მისივე თქმით, ამ საკითხზე პროკურორებთან საუბრის შემდეგ პასუხად პროკურატურის ბრიფინგი მიიღო, რომელზეც ფულის გათეთრებაში დაადანაშაულეს.