პარლამენტის დამოუკიდებელი დეპუტატი, ნატო ჩხეიძე, რომლის ოჯახსაც, ამავდროულად, ომეგა ჯგუფი ეკუთვნის, ამბობს, რომ თიბისი ბანკის დამფუძნებელმა, მამუკა ხაზარაძემ ომეგას საქმეზე საუბრისას ტყუილი თქვა. ჩხეიძის პასუხად ხაზარაძემ უარყო, რომ დაურეკა ბანკის დირექტორს ფულის გაცემის შესახებ.

"თქვენ მოგიწევთ სიმართლის თქმა იქ, სადაც მეტია სიმართლის თქმის პასუხისმგებლობა. თქვენ ღირსი ხართ, რა დღეშიც ახლა ხართ. ძალიან ცუდია ტყუილს, რომ ბრძანებთ", — უთხრა ჩხეიძემ ხაზარაძეს და კომიტეტის სხდომა დატოვა.

ომეგა ჯფუფის საქმე და თიბისი

2018 წლის 30 სექტემბერს ომეგა ჯგუფის დამფუძნებელმა, ზაზა ოქუაშვილმა განაცხადა, რომ ყოფილმა პრემიერმა და ქართული ოცნების დამფუძნებელმა, ბიძინა ივანიშვილმა მას ოთხი მილიონის გადარიცხვა მოსთხოვა და შემდეგ, ახლადშექმნილი კომპანიის მეშვეობით, გადაარიცხინა. ოქუაშვილმა განაცახადა, რომ ეს გადარიცხვა თიბისი ბანკიდან არასამუშაო საათებში შედგა.

პირველ ოქტომბერს რუსთავი 2-მა ომეგა ჯფუფის საქმეზე აუდიოჩანაწერი გაავრცელა. ტელეკომპანიის მტკიცებით, ჩანაწერით დასტურდებოდა, რომ თიბისი ბანკიდან 4 მილიონის გატანის ოპერაციაში უშუალოდ ჩართულები იყვნენ ყოფილი ბიზნეომბუდსმენი და ამჟამინდელი შს მინისტრი გიორგი გახარია და ყოფილი მთავარი პროკურორი ოთარ ფარცხალაძე.

თიბისი ბანკმა განცხადა, რომ საქმიანი რეპუტაციის შელახვისთვის ზაზა ოქუაშვილს უჩივლებდა. ბანკის დირექტორი, ვახტანგ ბუცხრიკიძე ამბობდა, რომ ბანკის შესახებ, ისევე როგორც სამუშაო საათებთან დაკავშირებით ტყუილი ინფორმაცია ვრცელდებოდა.

დღეს, 4 მარტს პარლამენტში საფინანსო-საბიუჯეტო კომიტეტის სხდომაზე თიბისის დამფუძნებლებს, მამუკა ხაზარაძესა და ბადრი ჯაფარიძეს უსმენენ. ხაზარაძემ განაცხადა, რომ არჩევნების წინ მაღალჩინოსანმა წერილი მიწერა, რომელშიც ეწერა, რომ მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარესზე.

ამავე სხდომაზე ხაზარაძემ განაცხადა ისიც, რომ ეროვნული ბანკის პრეზიდენტი და მისი მოადგილე აშანტაჟებდნენ. ის ორივე მათგანის პასუხისმგებლობის დაყენებას ითხოვს.