დემურ სტურუას საქმეზე ბრალდებულის, გოდერძი თევზაძის წინააღმდეგ უზენაეს სასამართლოში წარდგენილი საჩივარი სასამართლომ დაუშვებლად სცნო. ეს ნიშნავს, რომ უზენაესმა ძალაში დატოვა სააპელაციოს სასამართლოს გადაწყვეტილება, რომლითაც გოდერძი თევზაძე უდანაშაულოდ სცნეს.

22 წლის დემურ სტურუამ 2016 წლის 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

ბრალდებული პოლიციელი, გოდერძი თევზაძე ქუთაისის სასამართლომ გაამართლა.