თიბისი ბანკის დამფუძნებელი მამუკა ხაზარაძე აცხადებს, რომ ის და ბადრი ჯაფარიძე მზად არიან კიდევ ერთხელ მივიდნენ პარლამენტში და დაესწრონ კომიტეტის სხდომას. მისი თქმით, უახლოეს დღეებში ელოდებიან კონკრეტულ შემოთავაზებას საკანონმდებლო ორგანოსგან.

ხაზარაძის განცხადებით, მას არ მიეცა საშუალება ეთქვა სათქმელი. მისი თქმით, ეს თემა ცდება ერთი და ორი ადამიანის ან ინსტიტუტის საკითხს და მთელ ქვეყანას ეხება. მისივე თქმით, იმედი აქვს რომ მალე გაირკვევა სიმართლე და არ შეიქმნება ვითარება შემდგომი გაუგებრობისა და სპეკულაციებისთვის. ამის შესახებ ხაზარაძემ ფეისბუქგვერდზე დაპოსტა.

დღეს, 25 თებერვალს დარგობრივი ეკონომიკის კომიტეტის სხდომაზე თიბისი ბანკის საქმეზე უნდა ემსჯელათ, თუმცა სხდომა ისე დასრულდა, რომ საკითხზე არ უმსჯელიათ. 57 წუთის განამავლობაში დეპუტატები ფორმატზე შესათანხმებლად კამათობდნენ, თუმცა უშედეგოდ.

ფორმატზე დავა ეროვნული ბანკის პრეზიდენტის, კობა გვენეტაძის განცხადებას მოყვა. გვენეტაძის განმარტებით, რეგულატორის მიერ მიღებული გადაწყვეტილების შეფასება ღია სხდომაზე, რომელსაც ბანკის წარმომადგენლებიც ესწრებიან მართებული არ არის და ეს დააზარალებს ბანკის ინტერესებს.

ხაზარაძემ განაცხადა, რომ არ ეთანხმება გვენეტაძის მოსაზრებას. მისი თქმით, რამე ზიანი თუ შეიძლებოდა მიყენებოდა თიბისი ბანკს უკვე მიადგა. მისივე თქმით, შეილახა ქვეყნის რეპუტაციაც.

გაიგეთ მეტი: