ქართული ოცნების დეპუტატმა ეკა ბესელიამ პარლამენტში ჟურნალისტებთან საუბრისას თქვა, რომ როდესაც ისინი ნაციონალურ მოძრაობას ებრძოდნენ და "ტყვიების ზუზუნში იდგნენ" ირაკლი კობახიძე გოგლი-მოგლს მიირთმევდა.

"ჭუჭრუტანიდან გვიყურებდა, გავუძლებდით და გადავრჩებოდით თუ არა. გოგლი-მოგლზე გაზრდილი პატარა ბიჭები რომ თავს უფლებას აძლევენ და ასეთი ტონით ლაპარაკობენ, აი ამის პასუხს მიიღებს ახალა ჩემს ბოლო დასკვნაში. პარლამენტის როგორი თავმჯდომარე იქნება, ამ პასუხებს მოისმენს ისიც და საზოგადოებაც. ადამიანი, რომელიც მიიჩნევს რომ გუშინ რომ ბოროტებას სჩადიოდნენ, დღეს გასხივოსდნენ, ეს ადამიანი მორალურად ზუსტად იქ დგას, სადაც იდგნენ ის ადამიანები, ვისაც ჩვენ ვებრძოდით".

ეკა ბესელიამ ეს განცხადება მას შემდეგ გააჟღერა, რაც პარლამენტის თავმჯდომარემ თქვა, რომ ნაციონალურ მოძრაობასა და უმრავლესობის დეპუტატ ლევან გოგიჩაიშვილს შორის კონსენსუსი ნიშანდობლივია, მოსამართლეების უვადოდ დანიშვნის კანონპროექტზე.

პარლამენტში მოსამართლეების უვადოდ დანიშვნის შეჯერებასთან დაკავშირებით კანონპროექტზე მსჯელობდნენ. ირაკლი კობახიძემ განაცხადა, რომ კანონპროექტი კონსტიტუციას ეწინააღმდეგება.