თბილისში 18-დან 23 ივნისის ჩათვლით LGBTQI პრაიდი დაიგეგმა. კვირეულის ფარგლებში სხვადასხვა სოციალური, კულტურული და პოლიტიკური ღონისძიება გაიმართება.

On.ge პრაიდის ერთ-ერთ ორგანიზატორს, ნინო ბოლქვაძეს ესაუბრა, რომელმაც თქვა, რომ ამ ეტაპზე სამი ღონისძიებაა დაგეგმილი. ის ამბობს, რომ სამივე ღონისძიება მასშტაბურია და მას ათასობით ადამიანი დაესწრება.

დაგეგმილი ღონისძიებები

საერთაშორისო კონფერენცია

ნინო ბოლქვაძის ინფორმაციით, LGBTQI კვირეულის ფარგლებში საერთაშორისო კონფერენცია გაიმართება, რომელსაც საქართველოს მთავრობის, დიპლომატიური კორპუსის, სახალხო დამცველის აპარატის, საზოგადოებრივი ორგანიზაციების, უმცირესობებზე მომუშავე ორგანიზაციებისა და ლგბტ თემის წევრები დაესწრებიან. ბოლქვაძის ინფორმაციით, კონფერენციას ასევე დასწრებიან სხვადასხა ქვეყნების მთავრობის წარმომადგენლები.

როგორც ბოლქვაძე განმარტავს, ამ კონფერენციაზე თემის საჭიროებებზე ისაუბრებენ. განიხილავენ სახელმწიფოს პოლიტიკას, თუ რას აკეთებს მთავრობა იმისთვის, რომ საზოგადოება თემის მიმართ სოლიდარული და ტოლერანტული გახდეს. კონფერენცია შეეხება წარმატებებსაც, რომელსაც ქვეყანამ ამ მიმართულებით მიაღწია.

სოციალური სპექტაკლი

ბოლქვზე ამბობს, რომ კვირეულის ფარგლებში ფრანც კაფკას მოთხრობის, მეტამორფოზა მოტივებზე დაიდგმება სოციალური სპექტაკლი. ის განმარტავს, რომ მოთხრობა ადამიანის განსხვავებულ მდგომარეობაზეა, რომელიც მას სოციალურ კავშირში უშლის ხელს. მისი თქმით, ეს მოთხრობა ლგბტ თემს ეხმიანება და სწორედ ამიტომ შეირჩა.

ბოლქვაძის ინფორმაციით, სპექტაკლს 600 ადამიანი დაესწრება და დიდ თეატრალურ დარბაზში გაიმართება. მისივე თქმით, სპექტაკლის ბოლოს პანელდისკუსია გაიმართება, რომელშიც მონაწილეობას მიიღებენ სპექტაკლის რეჟისორი, მსახიობები, სცენარისტი, ქორეოგრაფი და ასევე დარბაზში მყოფი ადამიანები, რომლებსაც კითხვის დასმის საშუალება ექნებათ.

ღირსების მარში

მისივე თქმით, LGBTQI კვირეული ღირსების მარშით დასრულდება. ბოლქვაძე განმარტავს, რომ მარშს საზეიმო ან კარნავალის სახე არ ექნება. მისი თქმით, მარშის მიზანი საზოგადოებისთვის იმის ჩვენება იქნება, რომ თემის წევრებიც ჩვეულებრივი ადამიანები არიან. ამით აჩვენებენ საზოგადოებას, რომ მათაც აწუხებთ სიღარიბე, უმუშევრობა, გაზისა და დენის მაღალი ფასი, ოკუპაცია, თბილისში ჰაერის დაბინძურება, მოსახლეობის ემიგრაცია და ყველა ის თემა, რაც ზოგადად, საზოგადოებას აწუხებს. ბოლქვაძე ამბობს, რომ ამ მარშით კიდევ ერთხელ იტყვის თემი, რომ მათ მშვიდობიან, არაძალადობრივ გარემოში უნდათ ცხოვრება.

ბოლქვაძე On.ge-სთან ამბობს, რომ პრაიდი არავის საწინააღმდეგოდ არ არის მიმართული და თემი რომელიმე სხვა ჯგუფთან დაპირისპირებული მხარე არ არის. მისივე თქმით, კვირეული კონკრეტულ ორგანიზაციას არ ეკუთვნის.