პარლამენტის თავმჯდომარე ირაკლი კობახიძე აცხადებს, რომ თიბისი ბანკის საქმე სამართლებრივი საკითხია და სამართლებრივ ჭრილში უნდა გადაწყდეს. მისი თქმით, საკითხის პოლიტიკურ სარჩულზე აქტიურად ოპოზიცია საუბრობს, რაც გასაკვირი არ არის.

თიბისი ბანკის ირგვლივ მიმდინარე მოვლენებში პოლიტიკური ანგარიშსწორების საფრთხეებზე საუბრობენ არასამთავრობო ორგანიზაცია საერთაშორისო გამჭვირვალობაში. მათი თქმით, პროკურატურის მიერ თიბისი ბანკის დამფუძნებლების წინააღმდეგ 10 წლის წინანდელ საქმეზე დაწყებული გამოძიება და ეროვნული ბანკის მოთხოვნა მათი გადადგომის შესახებ ეჭვს ბადებს, რომ საქმე პოლიტიკურად არის მოტივირებული. მათივე თქმით, მიმდინარე პროცესები შესაძლოა ანაკლიის ღრმაწყლოვან პორტს უკავშირდებოდეს.

თიბისის საქმე

თიბისის ხელმძღვანელი პირების გადაყენების მოთხოვნაზე ინფორმაცია ეროვნულმა ბანკმა 14 თებერვალს გაავრცელა. ეროვნულმა ბანკმა თიბისი ბანკის აქციონერთა კრებას 2-თვიანი ვადა მისცეს მათი სამეთვალყურეო საბჭოდან გაწვევისათვის. მათი განმარტებით, გადაწყვეტილება არ ეხება არცერთი აქციონერის საკუთრებაში არსებულ წილებს ბანკში.

თიბისი ბანკში ამბობენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად. მათივე თქმით, მამუკა ხაზარაძე და ბადრი ჯაფარიძე, როგორც აქამდე, საქმიანობას აგრძელებენ თიბისი ჯგუფის ბრიტანული ჰოლდინგის TBC Bank Group PLC (თიბისი ბანკის მფლობელი მშობელი კომპანია) დირექტორთა საბჭოს თავმჯდომარისა და მოადგილის პოზიციებზე. მამუკა ხაზარაძემ კი განაცხადა, რომ ყველა საშუალებით დაიცავენ ბანკს და აქციონერების სამართლებრივ უფლებას, ადგილობრივ და საერთაშორისო ინსტიტუტებში

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. თიბისი ბანკმა დოკუმენტების ამოღებასთან დაკავშირებით პროკურატურას 9 იანვარს უპასუხა და გავრცელებული ინფორმაციას "მიზანმიმართული დისკრედიტაციისა და რეპუტაციის შელახვის მცდელობა" უწოდა.

ბანკის განცხადებაში ნათქვამი იყო, რომ პროკურატურის მიერ ამოღებული დოკუმენტები ეხება 2008 წლის რიგით, კანონიერ საბანკო ოპერაციას. ბანკში On.ge-ს განუცხადეს, რომ საქმე ეხება კერძო კლიენტის საბანკო ოპერაციას, რასაც ვერ გაასაჯაროვებენ. პროკურატურაში არ ამბობდნენ, რა საქმესთან დაკავშირებით ამოიღეს ბანკიდან ინფორმაცია, თუმცა განმარტავდნენ, რომ დოკუმენტები ომეგა ჯგუფის საქმეს არ ეხებოდა.