საქართველოს საკონსტიტუციო სასამართლო ხვალ, 13 თებერვალს დაიწყებს განხილვას რამდენად კონსტიტუციურია ე.წ. რეიდები ადამიანის პირადი ცხოვრებაში ჩარევასთან მიმართებით. მოსარჩელეები მიიჩნევენ, რომ გასაჩივრებულ ნორმაში ბუნდოვანი ტერმინებია.

"სადავო ნორმა არ ახდენს დანაშაულების/სამართალდარღვევების სიმძიმის მიხედვით დიფერენცირებას და მსუბუქი ხასიათის სამართალდარღვევაზე რეაგირების მიზნებისთვისაც კი შესაბამის ღონისძიებად მიიჩნევს სპეციალური საპოლიციო კონტროლის დაწყებას, რაც არაპროპორციული და არაგონივრულია", — აღნიშნულია საკონსტიტუციო სასამართლოს მიერ გავრცელებულ ინფორმაციაში.

მოსარჩელეებს მიაჩნიათ, რომ სპეციალური საპოლიციო კონტროლის დროს პირადი ცხოვრების უფლებაში ჩარევა ხდება სასამართლო კონტროლის გარეშე და ეწინააღმდეგება კონსტიტუციით დადგენილ ფორმალურ მოთხოვნებს.

"მოსარჩელე მიიჩნევს, რომ სადავო ნორმა, ადამიანის პირადი ცხოვრების უფლებაში ფართომასშტაბიანი ჩარევის პარალელურად, ადგენს ამგვარი ჩარევის გაუმართლებლად დაბალ სტანდარტს და ეწინააღმდეგება საქართველოს კონსტიტუციის მოთხოვნებს", — აღნიშნულია საკონსტიტუციო სასამართლოს მიერ გავრცელებულ პრესრელიზში.