სპორტისა და ახალგაზრდულ საკითხთა კომიტეტის თავმჯდომარე, მიხეილ ყაველაშვილმა სოლიდარობა გამოუცხადა ევროპის ჩემპიონს, ზურაბ დათუნაშვილს. გარდა ამისა, ყაველაშვილმა ჭიდაობის ფედერაციის პრეზიდენტის, გეგა გეგეშიძის ქმედებას მიუღებელი უწოდა.

"მექნება მასთან [დათუნაშვილთან] შეხვედრა და შევეცდები დავაახლოვოთ ეს პროცესი იმასთან, რომ აუცილებლად უნდა დაუბრუნდეს პროფესიულ საქმიანობას და აუცილებლად იჭიდაოს საქართველოს სახელით", — განაცხადა კომიტეტის თავმჯდომარემ ბიუროს სხდომაზე.

სხდომის შემდეგ ყაველაშვილმა ჟურნალისტებს უთხრა, რომ უმრავლესობა სასამართლო პროცესითაც დაინტერესდება, თუ რამდენად სწორად მიდის პროცესები. მისივე თქმით, ის ხედავს ხარვეზებს და მნიშვნელოვანია სპორტსმენის მონაწილეობა ფედერაციის საქმეებში.

როგორც მან აღნიშნა, ფედერაციებში მართვის სისტემებია განსავითარებელი და ასევე შემუშავდება ეთიკის ნორმები, რომლის საშუალებითაც რეაგირება მოხდება.

ზურაბ დათუნაშვილი, რომელიც ფედერაციის პრეზიდენტს ძალადობაში ადანაშაულებს, ამბობს, რომ არჩევანის წინაშეა დაასრულოს კარიერა ან სხვა ქვეყნის სახელი იასპარეზოს.

"მე რამდენიმე დღეა განვაახლე ინდივიდუალური ვარჯიში, თუმცა ჯერჯერობით არ ვიცი კონკრეტულად რისთვის ვემზადები, რადგან მოგეხსენებათ, საქალაქო სასამართლოს მიერ გამოტანილი აღკვეთის ღონისძიების მიხედვით ფედერაციის პრეზიდენტი დარჩა თანამდებობაზე, მე კი აქამდეც არაერთხელ აღვნიშნე, რომ ჩემი ამ ხელმძღვანელობასთან მუშაობის გაგრძელება არის შეუძლებელი", — წერს დათუნაშვილი.

დაპირისპირება ჭიდაობის ფედერაციაში

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს სპორტის სასახლეში მომხდარი დაპირისპირებისას, გეგა გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.