ეროვნულ-დემოკრატიული ინსტიტუტის (NDI) კვლევის მიხედვით, მოსახლეობაში ევროკავშირისა და ნატოს მხარდაჭერა 2013 წლის შემდეგ ყველაზე მაღალია.

კითხვაზე, მისაღებია თუ არა საქართველოს მთავრობის გაცხადებული მიზანი, საქართველო გახდეს ევროკავშირის წევრი, გამოკითხულთა 83 პროცენტი ამბობს, რომ მისაღებია, 9 პროცენტისთვის მიუღებელია, 7 პროცენტი კი ამბობს, რომ კითხვაზე პასუხი არ იცის.

NDI-ს კვლევის მიხედვით, უმცირესობათა დასახლებაში ევროკავშირის მხარდაჭერა 2018 წლის მარტთან შედარებით 50 პროცენტიდან 58-მდე გაიზარდა.

რაც შეეხება ნატო-ს, კითხვაზე, მისაღებია თუ არა საქართველოს მთავრობის გაცხადებული მიზანი, საქართველო გახდეს ნატოს წევრი, 78 პროცენტი ამბობს, რომ მისაღებია, 13 პროცენტისთვის ნატოში გაწევრიანება მიუღებელია, ხოლო 9 პროცენტი ამბობს, რომ კითხვაზე პასუხი არ იცის.

კვლევის მიხედვით, უმცირესობათა დასახლებაში ნატოს მხარდაჭერა 2018 წლის მარტთან შედარებით 26 პროცენტიდან 48-მდე გაიზარდა.

NDI-იმ საზოგადოებრივი აზრის ახალი კვლევა გამოაქვეყნა. საველე სამუშაოების თარიღები 2018 წლის 6-20 დეკემბრით თარიღდება. ჩატარდა 2205 დასრულებული ინტერვიუ. საშუალო ცდომილების ზღვარი +/- 2,1 პროცენტია.