კოალიცია დამოუკიდებელი და გამჭვირვალე მართლმსაჯულებისთვის მიიჩნევს, რომ უვადო მოსამართლეების კანდიდატები იუსტიციის საბჭოს განახლებულმა შემადგენლობამ უნდა დაასახელოს. მათი აზრით, საბჭო უნდა დატოვონ იმ წევრებმა, რომლებმაც მხარი დაუჭირეს 24 დეკემბერს მოსამართლეობის კანდიდატების პარლამენტში გადაგზავნას.

"არსებული შემადგენლობით ჯგუფის შენარჩუნება გამორიცხავს რეალურ ცვლილებებზე მსჯელობას და მოემსახურება მხოლოდ პროცესის კოსმეტიკურ შელამაზებას. ამის გათვალისწინებით, კოალიცია უარს ამბობს სამუშაო ჯგუფში მონაწილეობაზე და მიმართავს პარლამენტს არსებითად გადახედოს შექმნილ ფორმატს და ჯგუფის შემადგენლობას", — აღნიშნულია კოალიციის განცხადებაში.

მათივე თქმით, უზენაესი სასამართლოს მოსამართლეების არჩევა უნდა ეფუძნებოდეს სამ პრინციპს:

  1. დამსახურებაზე დაფუძნებულ მიდგომას;
  2. არჩევის პროცესის გამჭვირვალობასა და ღიაობას;
  3. პროცესის ობიექტურად და მიუკერძოებლად წარმართვას.

კოალიციის აზრი უზენაესი სასამართლოს მოსამართლეობის კანდიდატების შესარჩევად:

  1. იუსტიციის უმაღლესმა საბჭომ გამოაცხადოს ღია კონკურსი;
  2. კანდიდატებმა წარადგინონ ამომწურავი ინფორმაცია თავიანთი კვალიფიკაციის შესახებ;
  3. კანდიდატების შემოწმება ღია მოსმენით;
  4. კანდიდატების ნომინირება მოსამართლეთა წევრებისა და არამოსამართლე წევრების ხმათა 2/3-ით;
  5. იურიდიულ საკითხთა კომიტეტში სამუშაო ჯგუფის შექმნა;
  6. იურიდიულ კომიტეტს შეეძლოს სამუშაო ჯგუფის მომზადებული დასკვნის გაცნობა და დასკვნის მომზადება;
  7. დასკვნის მიუხედავად, პარლამენტში თითოეული კანდიდატისთვის ჯენჭიოსყრა.