დემურ სტურუას დედის ნონა ჯოჯუასა და მისი უმცროსი შვილის მიმართ განხორციელებულ ფიზიკური ძალადობის ფაქტთან დაკავშირებით არასამთავრობო ორგანიზაცია EMC განცხადებას ავრცელებს და წერს, რომ დემურ სტურუას დედას დაზიანებები სხეულის სხვადასხვა არეში აღენიშნება. მათივე თქმით, მოძალადე პირი თავდასხმის შემდეგ, ნონა ჯოჯუას მუქარის შემცველ შეტყობინებებს უგზავნის:

"ნონა ჯოჯუას განმარტებით, მასზე ფიზიკური თავდასხმის მომენტიდან, მოძალადე პირის მიერ სატელეფონო ზარებით და მესიჯებით გრძელდება სიცოცხლის მოსპობის მუქარა, რაც გამოძიების მიერ ასევე უნდა იქნეს გათვალისწინებული და გამოძიება მათ შორის უნდა გაგრძელდეს სისხლის სამართლის კოდექსის 151-ე მუხლით, რაც მუქარას გულისხმობს".

EMC ნანა ჯოჯუას ინფორმაციით, წერს რომ თავდასხმა უკავშირდება ერთ-ერთი მოწმის უკმაყოფილებას იმასთან დაკავშირებით, რომ ნონა ჯოჯუამ დემურ სტურუას საქმის გამოძიების პროცესში იგი გარკვეულ კონტექსტში დაასახელა სამართალდამცავ ორგანოებთან, რის შემდეგაც მოხდა ამ პირის მოწმის სახით დაკითხვა პროკურატურაში.

დემურ სტურუას დედას ნონა ჯოჯუას 3 სექტემბერს, გამთენიისას სცემეს.

EMC მოითხოვს, რომ დემურ სტურუას თვითმკვლელობამდე მიყვანის საქმე გადაეცეს დასავლეთ საქართველოს საოლქო პროკურატურას, რომელიც პოლიციის თანამშრომელთა მონაწილეობის გარეშე გამოიძიებს:

"იმ პირობებში, როცა დემურ სტურუას თვითმკვლელობამდე მიყვანის საქმეში ბრალდებული პოლიციის თანამშრომელია და ადგილობრივი პოლიციის მიმართ ოჯახს ნდობა არ გააჩნია, მიზანშეწონილად არ მიგვაჩნია, რომ ნონა ჯოჯუას ფიზიკური შეურაცხყოფის საქმეზე გამოძიება შინაგან საქმეთა სამინსიტრომ აწარმოსს".

ორგანიზაცია ასევე მიიჩნევს, რომ დღევანდელი ფიზიკური დაპირისპირების ფაქტი არ უნდა აღიქვან დემურ სტურუას საქმის გამოძიებისგან იზოლირებულად. გამოძიებამ აღნიშნული ძალადობა, მათ შორის, უნდა შეაფასოს დაზარალებულზე და მოწმეებზე შესაძლო ზეწოლის ფაქტად.

შინაგან საქმეთა სამინისტროში აცხადებენ, რომ საქმეზე გამოძიება დაიწყო 125-ე მუხლით, რაც ცემას გულისხმობს. მათივე განმარტებით ნონა ჯოჯუას ნაცნობ მამაკაცთან პირად საქმეზე მოუვიდა შელაპარაკება.

EMC-ის განცხადებით, გაუგებარია შინაგან საქმეთა სამინისტროს მიერ გაკეთებული განცხადება, რომ ნონა ჯოჯუას ცემა ხსენებულ პირთან პირადი ხასიათის კონფლიქტის შედეგი:

"იმის გათვალისწინებით, რომ საქმეზე გამოძიება დღეს დაიწყო, საგამოძიებო მოქმედებები ამ მომენტამდე ხორციელდება და საქმის მოტივი ჯერ გამოკვეთილი არ არის ეჭვს ბადებს შსს-ს მიერ ძალადობის მოტივის წინასწარი დასახელება ყოველგვარი საფუძვლის გარეშე. ეს კიდევ ერთი დამატებითი მიზეზია ნიშანია დემურ სტურუას დედის ცემის საქმის პროკურატურის მიერ დაქვემდებარებისთვის".

ორგანიზაცია მოითხოვს რომ დემურ სტურუას ოჯახის წევრთა სიცოცხლისა და ჯანმრთელობის უსაფრთხოებისთვის გამოიყენონ სისხლის სამართლის საპროცესო კოდექსით გათვალისწინებული დაცვის სპეციალური ღონისძიება.

"გარდაცვლილი სტურუას ოჯახის წევრები შიშის და დაუცველობის ქვეშ იმყოფებიან და მათზე განმეორებითი თავდასხმის თავიდან აცილებისთვის ამ ეტაპზე არანაირი ღონისძიება არ არის მიღებული".