მცხეთის ჯვრის მონასტერთან გარევაჭრობის საკითხზე საპატრიარქოში მოვაჭრეებს შეხვედრა ჰქონდათ. შეხვედრის შემდეგ მოვაჭრეებმა განაცხადეს, რომ საპატრიარქო პრობლემის მოგვარებას დაპირდა.

"მათ უარყვეს, რომ მამა კონსტანტინე [გარევაჭრობის] უარზეა. პირიქით, ისინი ამბობენ, რომ მამა კონსტანტინე თანახმაა იქ გაგრძელდეს გარევაჭრობა, ოღონდ უფრო ცივილურ ფორმებში. ისინი შეგვპირდნენ, რომ მამა კონსტანტინესთან ერთად გადაწყვეტენ საკითხს ისე, რომ იქნება ცივილურად, იქნება ეს დახლების ამოტანა თუ ახალი ტერიტორიის გამოყოფა, მოაგვარებენ ამ პრობლემას მაქსიმუმ ორ დღეში და ჩვენ ჩვეულებრივად შევძლებთ მუშაობის გაგრძელებას", — განუცხადა შეხვედრის ერთ-ერთმა მონაწილემ, მარიამ ჩაკვეტაძემ რუსთავი 2-ს.

გარევაჭრობის გამო მცხეთის ჯვრის მონასტრის კარები 14 იანვარს დაიკეტა. გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო. მაშინ მცხეთის მერმა აღნიშნულ ფაქტს სამარცხვინო უწოდა.

ჯვრის მონასტრის საძმომ განმარტა, რომ მონასტერი გარემოვაჭრეების გამო გარეთ შექმნილი "ანტისანიტარიისა და განუკითხაობის" გამო დახურეს და იძულებული იყვნენ გამოხატვის თავისუფლების "უკიდურესი ფორმა გამოეყენებინათ". მონასტრის დაკეტვას მალევე გამოეხმაურა საპატრიარქო და აღნიშნა, რომ მონასტერთან შექმნილი ვითარება გარემოვაჭრეების საქმიანობის მოწესრიგებისათვის გადადგმული ნაბიჯი იყო.

ორი დღის შემდეგ, 16 იანვარს ტაძრის კარები ვიზიტორებისთვის გაიხსნა, თუმცა გარევაჭრობა ამ დრომდე არ აღდგენილა.