მცხეთის ჯვრის მონასტერი გაიხსნა. როგორც მართლმადიდებელი ეკლესიის საპატრიარქოში On.ge-ს უთხრეს, ტაძრის კარები ვიზიტორებისთვის დილის რვა საათზე გაიღო.

მცხეთის მერის, გიორგი კაპანაძის თქმით, ამ დროისთვის გარევაჭრობა მისი თხოვნით შეჩერებულია. ის აპირებს, რომ მონასტრის მიმდებარე ტერიტორიაზე გამზადებული დახლები აიტანოს, რათა გარევაჭრობა ცივილურ გარემოში წარიმართოს.

"ეს მოვაჭრეები არიან მცხეთელები, რომლებიც სხვანაირად ოჯახს ვერ ინახავენ. სიცივეში, ყინვასა და ავდარში დგანან ყოველთვის იქ... კონსენსუსამდე მივალთ, რომ არც გარემოვაჭრეებს შეეშალოთ ხელი და არც მონასტერს", — უთხრა გიორგი კაპანაძემ On.ge-ს

გარევაჭრობის გამო მცხეთის ჯვრის მონასტრის კარები 14 იანვარს დაიკეტა. გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო. მაშინ მცხეთის მერმა აღნიშნულ ფაქტს სამარცხვინო უწოდა.

მონასტრის დაკეტვას გამოეხმაურა საპატრიარქო და აღნიშნა, რომ მონასტერთან შექმნილი ვითარება გარემოვაჭრეების საქმიანობის მოწესრიგებისათვის გადადგმული ნაბიჯი იყო.

"ჩვენ გვესმის, რომ ხალხს უჭირს და ლუკმა-პურის საშოვნელად სხვადასხვა საშუალებას მიმართავს, მაგრამ როდესაც ამდენი ტურისტი და მომლოცველი ჰყავს ქვეყანას უხერხულია, ეს ტაძრები თავისი დიდებულებით გვიყურებდნენ წარსულიდან და XXI საუკუნის საქართველო კი მათ გვერდით მიუღებელი და მოუწესრიგებელი სახით იყოს წარმოჩენილი"

მცხეთის ჯვრის მონასტერი VI საუკუნის კულტურული ძეგლია, რომელიც ტურისტებს შორის დიდი პოპულარობით სარგებლობს. ის მსოფლიო კულტურული მემკვიდრეობის ძეგლთა სიაში არის შეტანილი.