ბინების გაქირავების ამერიკული კომპანია Airbnb ვებგვერდიდან წაშლის იმ შემოთავაზებებს, რომელიც საქართველოს ოკუპირებული ტერიტორიებიდან, აფხაზეთიდან და ცხინვალის რეგიონიდან იქნება. ამის შესახებ განცხადება კომპანიამ 17 იანვარს გაავრცელა.

კითხვაზე, რატომ მიიღო კომპანიამ ეს გადაწყვეტილება, განცხადებაში ასეთი პასუხი წერია: ოკუპირებულ ტერიტორიებზე განთავსებული სახლები დღეს დაინტერესებულ მხარეებს შორის დავის მთავარი საგანია და შესაძლოა, ინფორმაციის განთავსების გამო დაძაბულობა მოხდეს.

ეს პირველი შემთხვევა არ არის, როცა კომპანიამ ასეთი გადაწყვეტილება მიიღო. ასე მოხდა გასული წლის ნოემბერშიც, როცა კომპანიამ იორდანიის დასავლეთ სანაპიროზე მდებარე 200 ბინა წაშალა. კომპანიის განცხადებით, მიზეზი პალესტინა-ისრაელის კონფლიქტი და "დასავლეთ სანაპიროზე ოკუპირებული ტერიტორიები" იყო.

Airbnb-ზე დღეს 191 ქვეყნის 81 000 ქალაქის შესახებ არის ინფორმაცია განთავსებული.