ქართული ოცნების დეპუტატი ბექა ნაცვლიშვილი აცხადებს, რომ გუნდიდან არავის გარიცხვის მომხრე არ არის. დეპუტატის თქმით, მისი მიზანია, რომ "პარტიაში არ მოხდეს რყევები, რომელიც ქართულ ოცნებას დაასუსტებს".

კითხვაზე, გულისხმობს თუ არა რყევაში ეკა ბესელიას პარტიიდან გარიცხვას, ბექა ნაცვლიშვილი პასუხობს, რომ ქართულმა ოცნებამ ბესელიასა და გედევან ფოფხაძის გარიცხვის ფასზე უნდა იფიქროს.

დღეს, 10 იანვარს ქართული ოცნების თავმჯდომარემ, ბიძინა ივანიშვილმა განცხადება გაავრცელა, რომელშიც აღნიშნა, რომ ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის და გუნდურობის პრინციპების წინააღმდეგ წავიდა.

ივანიშვილის განცხადების შემდეგ დეპუტატებმა დაიწყეს საუბარი ბესელიას პარტიიდან სავარაუდო გარიცხვის შესახებ. "გარიცხვა ცუდი სიტყვაა, ალბათ ასეთი პოზიციებით ჩვენ გუნდში ერთად ვერ დავრჩებით", — ასე გამოეხმაურა პარლამენტის ვიცე-სპიკერი გია ვოლსკი ამ საკითხს.

გედევან ფოფხაძემ, რომელიც პარტიაში დაწყებული დაპირისპირების შემდეგ ბესელიას აქტიური მხარდამჭერია, განაცხადა, რომ ბესელიას პარტიიდან გარიცხვის შემთხვევაში ქართულ ოცნებას თავადაც დატოვებს.