საპარლამენტო უმრავლესობის წევრი, გედევან ფოფხაძე ამბობს, რომ ის ქართულ ოცნებას დატოვებს, თუ პარტიას ეკა ბესელიას დაატოვებინებენ. პარტიის დატოვებაზე დეპუტატმა ჟურნალისტებთან საუბრისას ირიბად გაუსვა ხაზი.

"პარტია, რომელიც გარიცხავს ეკა ბესელიას იმის გამო, რომ ის იცავს იმ ღირებულებებს, რომლითაც ეს პარტია შეიქმნა, ამ შემთხვევაში ეკა ბესელიაა ქართული ოცნება და არა — ის ნაწილი, რომელიც მას რიცხავს. ანუ მე ვიქნები იქ, სადაც ვიყავი თავიდანვე", — განმარტა ფოფხაძემ.

მისი თქმით, თუ უზენაესი სასამართლოს მოსამართლეების კანდიდატებზე "მორალურ გადაწყვეტილებას" მიიღებენ, "არავინ არსად გაიქცევა".

დღეს, 10 იანვარს ქართული ოცნების თავმჯდომარემ, ბიძინა ივანიშვილმა განცხადება გაავრცელა, რომელშიც აღნიშნა, რომ ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის და გუნდურობის პრინციპების წინააღმდეგ წავიდა.

ივანიშვილის განცხადების შემდეგ დეპუტატებმა დაიწყეს საუბარი ბესელიას პარტიიდან სავარაუდო გარიცხვის შესახებ. "გარიცხვა ცუდი სიტყვაა, ალბათ ასეთი პოზიციებით ჩვენ გუნდში ერთად ვერ დავრჩებით", — ასე გამოეხმაურა პარლამენტის ვიცე-სპიკერი გია ვოლსკი ამ საკითხს.

ბექა ნაცვლიშვილმა კი აღნიშნა, რომ ქართულმა ოცნებამ უნდა იფიქროს პარტიიდან ბესელიასა და გედევან ფოფხაძის გარიცხვის ფასზე.