საკონსტიტუციო სასამართლოში გიგი უგულავასა და ე.წ. კაბელების საქმის პროცესი ჩაიშალა. 1 სექტემბერს, საკონსტიტუციო სასამართლომ განცხადება გაავრცელა, სადაც სხდომის არ ჩატარების მიზეზებზე არაფერია ნათქვამი:

"პირველ სექტემბერს 15:00 საათზე დაგეგმილი N740 და N764 გაერთიანებული კონსტიტუციური სარჩელების (მოსარჩელეები - გიორგი უგულავა, ნუგზარ კაიშაური,დავით წიფურია, გიზო ღლონტი, გიორგი ლობჟანიძე, არჩილ ალავიძე; მოპასუხე - საქართველოს პარლამენტი) არსებითი განხილვა არ შედგება. მხარეებს დამატებით ეცნობებათ არსებითი განხილვის თარიღის შესახებ".

გიგი უგულავას ადვოკატმა ბექა ბასილაიამ ჟურნალისტებთან საუბარში განაცხადა, რომ მოსამართლეები ბიძინა ივანიშვილის დაკვეთას ასრულებენ:

"მოსამართლეები თავაძე, ბურჯანაძე, სიჭინავა, ცაბუტაშვილი, ფაფიაშვილი არიან ბიძინა ივანიშვილის ჯიბის მოსამართლეებად ქცეულნი, ასრულებენ ამ ადამიანის პირდაპირ დაკვეთებს, შესაბამისად ბიძინა ივანიშვილის ოლიგარქიულ კორუმპირებულ ინტერესებში არ შედის მოხდეს განხილვა გიორგი უგულავას და კაბელების საქმის, რამდენადაც ამ საქმის განხილვის შემდეგ, გიორგი უგულავა უპირობოდ უნდა გათავისუფლდეს. ივანიშვილის ინტერესშია ოლიგარქიული კორუმპირებული სისტემის შენარჩუნება".

ასევე, ტელეკომპანია რუსთავი 2-ის მიერ მოპოვებული ინფორმაციით, საკონსტიტუციო სასამართლოს მოსამართლე ოთარ სიჭინავა, რომელსაც დღეს ბათუმში სხდომა უნდა ჩაეტარებინა, თბილისში იმყოფება. კურიერის ჟურნალისტმა ის იმ დრო ჩაწერა, როდესაც მოსამართლე საკუთარ სახლთან ძაღლებს ასეირნებდა. ოთარ სიჭინავამ სასამართლო სხდომის ჩაშლის მიზეზები არ განმარტა და თქვა, რომ ამაზე ოფიციალური განცხადება გაკეთდება.