ბრაზილიის მემარჯვენე, ოპოზიციური ძალების მიერ პრეზიდენტ დილმა რუსეფის მაისში დაწყებული იმპიჩმენტის პროცედურა 31 აგვისტოს წარმატებით დასრულდა – სენატის 62–მა წევრმა 20–ის წინააღმდეგ მხარი დაუჭირა მემარცხენე პრეზიდენტის იმპიჩმენტს. დილმა რუსეფის პოსტს ახალ არჩევნებამდე, რომელიც 2019 წელს გაიმართება, პრეზიდენტის პოსტს მემარჯვენე–ცენტრისტი მიშელ ტემერი დაიკავებს. ტემერი 2011 წლიდან ბრაზილიის ვიცე–პრეზიდენტი იყო და 2016 წლის მაისიდან ასრულებს პრეზიდენტის მოვალეობას. სწორედ მაისში დაიწყო რუსელფის იმპიჩმენტის პროცედურა, რის შემდეგაც ის თანამდებობას დროებით ჩამოაშორეს.

ოპონენტები დილმა რუსეფსა და მის მემარცხენე, მშრომელთა პარტიას საბიუჯეტო სახსრებით მანიპულირებაში ადანაშაულებენ. ოპონენტთა თქმით, 2014 წელს, როცა რუსელფმა მეორე ვადით იყარა კენჭი, არჩევნებამდე მან საბიუჯეტო სახსრები გამოიყენა პოპულისტური სოციალური პროგრამების დასაფინანსებლად, რითაც მოსახლეობის მხარდაჭერას მიაღწია, თუმცა, ეკონომიკა დააზიანა. ამჟამად ბრაზილიის ეკონომიკა რთულ მდგომარეობაშია, ინფლაციის დონე კი მაღალია, რამაც ხელი შეუწყო რუსეფის წინააღმდეგ მოსახლეობის დიდი ნაწილის განწყობას.

თავად დილმა რუსეფი ამბობს, რომ ეს პროცესი მისი მემარჯვენე ოპონენტების მხრიდან განხორციელებული შურისძიებაა. ის ყველა ბრალდებას უარყოფს.

დილმა რუსეფი ბრაზილიის პირველი ქალი პრეზიდენტი 2011 წელს გახდა. ის 1960–იან წლებში ბრაზილიის დიქტატორული რეჟიმის წინააღმდეგ იბრძოდა და იყო მარქსისტი პარტიზანი, რის გამოც რამდენიმე წლით დაიჭირეს და ციხეში აწამებდნენ, მის წინააღმდეგ იყენებდნენ ელექტროშოკსაც. რუსელფის იმპიჩმენტით ბრაზილიაში დასრულდა მემარცხენეთა 13–წლიანი მმართველობა.