On.ge-ის ერთგული მკითხველი უკვე იცნობს ცინცინატის ზოოპარკის გრაციოზულ ბეჰემოთს ფიონას. ამიტომ, ვფიქრობთ უნდა იცოდეთ, რომ მან 2019 წელი ჩვენი უმრავლესობის მსგავსად დაიწყო — წონაში მატებით.

ფიონა 2017 წლის იანვარში დაიბადა და 13 კილოგრამს იწონიდა. თითქმის ორი წლის თავზე, მისი წონა უკვე 450 კილოგრამს აჭარბებს.

რადგან მდედრი ბეჰემოთების საშუალო წონა ზრდის დასრულების შემდეგ 1300 კილოგრამს აჭარბებს, ფიონა წონაში კლებას სულაც არ გეგმავს. პირიქით. მას წონაში მატების კიდევ გრძელი გზა აქვს გასავლელი, რომელიც გემრიელად ჭამას, დასვენებას და წყალში გრაციოზულ ნავარდს მოიცავს. ფიონა 2 წლის 24 იანვარს ხდება.

ბეჰემოთები დაბადებისას 22-დან 45 კილოგრამამდე იწონიან. თუმცა, ფიონა დღენაკლული დაიბადა, რის გამოც მისი გადარჩენის შანსი მცირე იყო.

"ფიონას წონის მატება მნიშვნელოვანია, რადგან არ ვიცოდით, გადარჩებოდა თუ არა. მან 13 კილოგრამიდან დაიწყო და ახლა ჯანრმთელი ბეჰემოთის წონას უახლოვდება", - განაცხადა ზოოპარკმა.

ახალშობილი ფიონა. 2017 წლის დასაწყისი

ფიონა ახლა

მას შემდეგ, რაც ცხოველმა 430 კგ-ს გადააჭარბა, ზოოპარკმა საზეიმო ღონისძიება მოაწყო. დამსწრეები პარკში ორიგინალური კოსტიუმებით გამოცხადდნენ და 1-კილომეტრიანი სეირნობა მოაწყეს.