საქართველოს საპარლამენტო უმრავლესობის წევრი, ეკა ბესელია ფიქრობს, რომ გია აბაშიძეს მის წინააღმდეგ ბრალდების გავრცელება დაავალეს. ასე გამოეხმაურა პარლამენტის დეპუტატი მის მიმართ გაჟღერებულ კორუფციის შესახებ ბრალდებას.

აბაშიძე, რომელიც საზოგადოებაში პოლიტიკის ექსპერტის სტატუსითაა ცნობილი, Facebook-ზე წერს, რომ ეკა ბესელიას კორუფციაში ბრალდების გამო უმრავლესობიდან გარიცხავენ.

"წლებია არსებობდა მოარული ხმები, რომ ქალბატონი ბესელია ჯერ კიდევ ლადო ჭანტურიას თავმჯდომარეობის პერიოდიდან, გარკვეულწილად აგვარებდა რაღაც საქმეებს უზენაეს სასამართლოში... "ჩეთემ ჰაუსის" ინფორმაციით, ეკა ბესელიამ კომპრომატების "მასწერ სპორტა"-ს ზაზა ოქუაშვილისგან აიღო ქრთამი "ომეგას" მრავალმილიონიანი დავის მოსაგვარებლად. თუმცა, ეს დავა ვერ მოგვარდა და ბესელიას მოუწია ქრთამის ნაწილის დაბრუნება. ამ ყველაფრის ჩანაწერი კი, როგორც მითხრეს, ოქუაშვილს გაუკეთებია და ახალი გასროლით ემუქრება "ქოცნებას", — აღნიშნავს აბაშიძე.

ბესელია ამბობს, რომ აბაშიძე ქართულ ოცნებაში მუშაობს, თუმცა მას პირადად არ იცნობს.

"მისგან მიკვირს, ვინ დაავალა ამის დაწერა... გია აბაშიძე აქტიური [თანამშრომელი] არაა, მაგრამ ის მე მყავს ჩვენს ოფისში ნანახი, ამიტომ მგონია, რომ მას ეს დავალება მისცეს. არ მინდა დავიჯერო, რომ ეს არის ის გზა და ფორმა, რომლითაც რაღაც ჯგუფმა ჩემ წინააღმდეგ ომი გადაწყვიტა", — განუცხადა ეკა ბესელიამ რუსთავი 2-ს.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

გუნდში დაწყებული დაპირისპირებებიდან რამდენიმე დღეში, დღეს, 3 იანვარს ქართულ ოცნებაში პარტიის სხდომა ჩაინიშნა. ბესელია ამ შეხვედრას არ ესწრება, ამბობს, რომ საზღვარგარეთ არის. მისი თანაპარტიელები კი მის შესაძლო გარიცხვასთან დაკავშირებით არ საუბრობენ.