7 არასამთავრობო ორგანიზაცია სისხლის სამართლის საპროცესო კოდექსში შესატან ცვლილებებს ეხმაურება და აცხადებს, რომ პარლამენტმა რამდენიმე გარემოებას უნდა მიაქციოს ყურადღება. მათი თქმით, დაუშვებელია, რომ ფარული საგამოძიებო მოქმედებები ყველა სამოხელეო დანაშაულზე გავრცელდეს.

არასამთავრობოები აცხადებენ, რომ ფარული საგამოძიებო მოქმედებები წარმოადგენს ადამიანის პირადი ცხოვრების უფლების შეზღუდვას, ამიტომ ეს მხოლოდ უკიდურესი აუცილებლობით უნდა იყოს განპირობებული. მათი თქმით, საკანონდებლო ცვლილებები ცდება ადამიანის უფლებათა ევროპული სასამართლოს გადაწყვეტილების აღსრულების ფარგლებს.

მათივე თქმით, საკანონმდებლო ცვლილებები კორუფციასთან ბრძოლის არაეფექტურ და შეუსაბამო გზას წარმოადგენ და არ შეიძლება გამართლებული იყოს ფარული საგამოძიებო მოქმედებების დაუსაბუთებელი გავრცელება სამოხელეო დანაშაულის მთელ თავზე.

ზემოაღნიშნულიდან გამომდინარე, არასამთავრობოები მიმართავენ პარლამენტს:

  • საკონსტიტუციო სასამართლოს მიერ გადაწყვეტილების მიღებამდე თავი შეიკავოს ფარული საგამოძიებო მოქმედებების შესახებ კანონმდებლობის ფრაგმენტული ცვლილებებისაგან, რომელიც კიდევ უფრო გაზრდის პირადი ცხოვრების უფლების დარღვევის რისკებს;
  • კანონპროექტზე მსჯელობისას გაითვალისწინოს ჩვენ მიერ წარმოდგენილი შენიშვნები და მოსაზრებები;
  • კანონპროექტის ინიციატორისაგან მოითხოვოს თითოეულ მუხლზე დასაბუთება (სტატისტიკა, კვლევა, რეკომენდაცია თუ პრაქტიკის ანალიზი), თუ რაზე დაყრდნობით უნდა გავრცელდეს აღნიშნულ დანაშაულზე ფარული საგამოძიებო მოქმედება, რა ლეგიტიმური აუცილებლობის წინაშე დგას სახელმწიფო ფარული საგამოძიებო მოქმედებებით აღკვეთოს სამოხელეო დანაშაულის თავით გათვალისწინებული ნებისმიერი ქმედება და მხოლოდ ამის შემდეგ მიიღოს გადაწყვეტილება.

იუსტიციის სამინისტროს სურს, რომ ყველა ტიპის სამოხელეო დანაშაულზე ფარული მიყურადებისა და კომპიუტერული მონაცემების მოპოვების უფლება ჰქონდეს. ინიციატივის ლეგიტიმურობის დასადასტურებლად სამინისტროს ორი არგუმენტი მოჰყავს. პირველი, კორუფციასთან ბრძოლის სურვილია, ხოლო მეორე ვანო მერაბიშვილის ციხიდან გაყვანის საქმის გამოძიების ხარვეზები. ინიციატივის მიხედვით, საპროცესო კოდექსში ცვლილები უნდა შევიდეს. აღნიშნულ ინიციატივას პარლამენტი დღეს განიხილავს.

გაიგეთ მეტი: