"თქვენი შეკითხვების არც მე და არც ჩემს გუნდს არ გვეშინია. არც არასოდეს გვეშინოდა იმიტომ, რომ ლოგიკურად საკმაოდ სუსტად მსჯელობთ", — ასე მიმართა შინაგან საქმეთა მინისტრმა გიორგი გახარიამ ევროპული საქართველოს დეპუტატებს. გახარიამ საპარლამენტო უმცირესობის დეპუტატებს ურჩია შეწყვიტონ "ფსევდოინტელექტუალური ცეკვა" და შინაარსობრივ საუბარზე გადავიდნენ.

"არ გადამრიოთ, რა მაგრები ხართ. კიდევ ერთხელ ვიმეორებ და ახლა მომისმინეთ ძალიან ყურადღებით. როდესაც ატრიალებთ ამ ფრაზებს, ამას ვეძახი მე თქვენს ფსევდოინტელექტუალურ ცეკვებს კამერების წინ. შეგიძლიათ გააგრძელოთ და მე თქვენ გეუბნებით და გთავაზობთ შინაარსობრივ საუბარს და სად წახვალთ აი ამ ფსევდოინტელექტუალური უმიზნო და უაზრო დებატებით", — განაცხადა მინისტრმა.

მინისტრმა მანამდეც არაერთხელ შეაფასა ევროპული საქართველოს დეპუტატების დასმული კითხვები და მათ "ჩამჭრელი", "ცინიკური", "დემაგოგიური" უწოდა. მინისტრმა აღნიშნა ისიც, რომ საპარლამენტო უმცირესობის წევრები ხორავას ქუჩის ტრაგედიას პოლიტიკური სპეკულაციებისთვის იყენებდნენ.

შს მინისტრმა დღეს, 21 დეკემბერს პარლამენტში რიგაგრეშე სხდომაზე სიტყვით გამოსვლა იმაზე საუბრით დაიწყო, რომ მისი მოხსენება იქნება "სტრუქტურირებული, კონკრეტულ გეგმებზე მორგებული და ძალზედ მოკლე". მანვე აღნიშნა, რომ პარლამენტში მისული იყო მწვავე დისკუსიისთვის, და არა პოლიტიკური ცეკვებისთვის.