პრეზიდენტის ადმინისტრაციის მომავალი ხელმძღვანელი, ლაშა ჟვანია ამბობს, რომ სალომე ზურაბიშვილი თავისი გუნდის შემადგენლობას კვირის ბოლოს ან მომავალი კვირის დასაწყისში თავად გამოაცხადებს. მისივე თქმით, სავარაუდოა, რომ 18 დეკემბერს პრეზიდენტი ათონელის რეზიდენციას მოინახულებს.

ინაუგურაციიდან მეორე დღეს, 17 დეკემბერს პრეზიდენტის რანგში სალომე ზურაბიშვილმა პირველი სტუმრები, კერძოდ კი, უცხოეთიდან ჩამოსული დელეგაციის წარმომადგენლები სასტუმროში მიიღო. როგორც ჟვანიამ განაცხადა, ათონელის რეზიდენციაში საპრეზიდენტო ფლიგელის ნაწილი ჯერ დასრულებული არ არის და მას კიდევ რამდენიმე თვე დასჭირდება.

"საპრეზიდენტო ფლიგელი ჯერ შიგნიდან არ არის დასრულებული. მაგრამ სრულად დასრულებული არის ადმინისტრაციული ფლიგელი, რომელიც უკან არის და პრეზიდენტი დროებით საქმიანობას დაიწყებს ადმინისტრაციის ფლიგელში", — განაცხადა ჟვანიამ.

ამ დროისთვის ცნობილია, რომ პრეზიდენტის ადმინისტრაციის ხელმძღვანელი ლაშა ჟვანია იქნება, რომელიც მანამდე საპატრიარქოს ფონდის ხელმძღვანელი იყო. პირველი არხის ინფორმაციით კი, საპარლამენტო მდივანი დიმიტრი გაბუნია გახდება. გაბუნია არაერთი გახმაურებული საქმეში მონაწილეობდა ადვოკატის სტატუსით. ის იყო ქალთა მიერ სექსუალურ შევიწროებაში დადანაშაულებული ზვიად დევდარიანის ადვოკატიც.

სალომე ზურაბიშვილის ინაუგურაცია თელავში, ერეკლე მეორის სასახლეში 16 დეკემბერს გაიმართა. ღონისძიებას 1 800-ზე მეტი სტუმარი დაესწრო. სტუმრებს შორის იყვნენ მმართველი გუნდისა და დიპლომატიური კორპუსის წარმომადგენლები. ცერემონიისთვის 50-ზე მეტი ქვეყნის 150-ზე მეტი მაღალი რანგის სტუმარი ჩამოვიდა.

ცერემონიას პრეზიდენტებიდან მხოლოდ სომხეთის პრეზიდენტი, არმენ სარქისიანი და საფრანგეთის ყოფილი პრეზიდენტი, ნიკოლა სარკოზი დაესწრნენ.

ღონისძიებას ესწრებოდა ყოფილი პრეზიდენტი გიორგი მარგველაშვილი და ყოფილი ლედი, მაკა ჩიჩუა. ასევე, სტუმრებს შორის იყვნენ საზოგადოებისთვის ცნობილი სახეები.

ქართული ოცნების თავმჯდომარე, ბიძინა ივანიშვილი ინაუგურაციას არ დასწრებია. ღონისძიებაში მონაწილეობაზე უარი თქვეს ნაციონალურმა მოძრაობამ და ევროპულმა საქართველომ.

ამავე თემაზე: