საპატრიარქოს ფონდის ხელმძღვანელი ლაშა ჟვანია არჩეული პრეზიდენტის, სალომე ზურაბიშვილის ადმინისტრაციის უფროსი გახდება. ჟვანიამ განაცხადა, რომ პატრიარქისგან მიიღო კურთხევა, რომ ახალ თანამდებობაზე გადავიდეს.

"არჩეულმა პრეზიდენტმა მიმართა პატრიარქს, რომ მე დამნიშნოს პრეზიდენტის ადმინისტრაციის უფროსად", — განაცხადა ჟვანიამ, რომელიც 2008-2009 წლებში ეკონომიკის მინისტრი იყო.

ლაშა ჟვანია 2003 წელს საგარეო საქმეთა სამინისტროში სალომე ზურაბიშვილის მოადგილე იყო. მანამდე კი 2002–2003 წლებში საქართველოს ფინანსთა მინისტრის მოადგილე იყო. ამავე პერიოდში იყო საქართველოს ანტიკორუფციული საბჭოს მუდმივი წევრი.

არჩეული პრეზიდენტი სალომე ზურაბიშვილი საპატრიარქოს არჩევნების მეორე დღეს ეწვია. ან როგორც ზურაბიშვილმა თქვა, პატრიარქი იყო პირველი ადამიანი ვინც მიულოცა მას არჩევნებში გამარჯვება და თავისთან მიიწვია. ზურაბიშვილი და პატრიარქი ერთმანეთს არჩევნებამდე ერთი დღით ადრეც შეხვდნენ.

სალომე ზურაბიშვილმა არაერთხელ განაცხადა, რომ მისი ადმინისტრაცია ავლაბრის სასახლეს დატოვებს და ათონელის რეზიდენციაში გადაინაცვლებს. უკვე დაიწყო ორბელიანების რეზიდენციის ინაუგურაციისთვის მომზადება. შენობაში კოსმეტიკური რემონტი ტარდება, მის გარეთ კი ქუჩის რეაბილიტაცია მიმდინარეობს. თბილისის მერის, კახა კალაძის თქმით, სამუშაოები პრეზიდენტის ინაუგურაციამდე უნდა დასრულდეს.

ქართული ოცნების საარჩევნო დაპირების მიხედვით, ათონელის ქუჩაზე მდებარე ორბელიანების სასახლეში უნდა გადასულიყო საქართველოს პრეზიდენტის ადმინისტრაცია. 2013 წლის არჩევნების დასრულების შემდეგ გიორგი მარგველაშვილმა განაცხადა, რომ არ აპირებს ადმინისტრაციის ავლაბრიდან გადატანას. ეს საკითხი გრძელვადიანი დაპირისპირების საგანიც კი გახდა. ივანიშვილის მთავარი არგუმენტი იყო ის ხარჯი, რაც ავლაბრის რეზიდენციის შენახვას სჭირდებოდა. მისი თქმით ეს იყო "ჭარბი ფართი".

საქართველოს არჩეული პრეზიდენტის, სალომე ზურაბიშვილის ინაუგურაცია 16 დეკემბერს გაიმართება. ქვეყნის ახალი პრეზიდენტის მიერ ფიცის დადებისა და უფლებამოსილებაში შესვლის ცერემონია კონსტიტუციის მიხედვით, პრეზიდენტის არჩევის დღიდან მესამე კვირა დღეს იმართება. სალომე ზურაბიშვილის მიერ პრეზიდენტის ფიცის დადებისთანავე წყდება მოქმედი პრეზიდენტის, გიორგი მარგველაშვილის უფლებამოსილება.