საკრებულოს რიგგარეშე სხდომიდან სამოქალაქო აქტივისტი, ირაკლი კუპრაძე სხდომათა დარბაზიდან გააძევეს, რის შედეგადაც მან ფიზიკური დაზიანებები მიიღო. თავდაპირველად კუპრაძე საავადმყოფოში გადაიყვანეს, მოგვიანებით კი პოლიციის განყოფილებაში დაკითხვაზე 2 საათის განმავლობაში იმყოფებოდა.

როგორც თავად კუპრაძე აღნიშნავს, ინციდენტი მას შემდეგ მოხდა, რაც მან სხდომაზე სიტყვით გამოსვლა მოითხოვა. მან განმარტა, რომ პოლიცია სასწრაფო დახმარების ბრიგადამ გამოიძახა, რომელმაც გამოკითხვის შედეგად მიიღო ინფორმაცია, რომ ეს იყო ძალადობის შედეგად მიღებული ტრავმა:

"შემდეგ საავადმყოფოდან გადმომიყვანეს განყოფილებაში, სადაც დავწერე ახსნა-განმარტებითი ბარათი და მოკვლევა დაიწყება იმაზე, თუ რამდენად მართლზომიერად გამომიყვანეს, უფრო სწორად გამომაგდეს საკრებულოს შენობიდან".

26 აგვისტოს თბილისის საკრებულოში დავით ნარმანია ორწლიანი ანგარიშით წარსდგა. საკრებულოს რიგგარეშე სხდომის ჩატარება საკრებულოს ოპოზიციამ მას შემდეგ მოითხოვა, რაც 17 აგვისტოს ყაზბეგის 24 ნომერში ასწლოვანი ნაძვები გაჩეხეს.

პარალელურად დავით ნარმანიას გადადგომის მოთხოვნით ენმ ხელმოწერებს აგროვებს, პარტიზანული მებაღეობა კი მერიასთან ერთ კვირაზე მეტია საპროტესტო აქციებს მართავს.

ამასთან, 24 აგვისტოს თბილისის მერიაში გამწვანების რეგულაციების თემაზე გამართულ შეხვედრაზე თბილისის მერმა ირაკლი კუპრაძეს სიტყვიერი შეურაცხყოფა მიაყენა, რაზეც საზოგადოებას მოგვიანებით ბოდიში მოუხადა:

"მე თქვენთვის სიტყვა არ მომიცია, ვინ არის ეს. მაიმუნი ვირიშვილი, ულტიმატუმებით შემოვიდა".