შინაგან საქმეთა სამინისტროს განცხადებით, ზესტაფონში ე.წ. ქურდული სამყაროს წევრობისთვის ბრალდებული პირი დააკავეს. ჩადენილი დანაშაული 7-იდან 10 წლამდე თავისუფლების აღკვეთას ითვალისწინებს.

უწყების ინფორმაციით, დაკავებული აღიარებს ე.წ. ქურდულ სამყაროს. მათივე თქმით იგი ძმასთან, უცხოეთში მყოფ ქართველ ე.წ. კანონიერ ქურდთან — ფრიდონ სულაქველიძესთან (მეტსახელად "პაწუა") ერთად მონაწილეობდა ე.წ. ქურდულ გარჩევებში და აქტიური კავშირი ჰქონდათ ქურდული სამყაროს სხვა წევრებთან.

როგორც შსს აცხადებს, ორგანიზებული დანაშაულის ჯგუფის წევრებს ძმები აძლევდნენ დავალებებს და ე.წ. ქურდული სამყაროს მიერ დადგენილი წესებით მოქმედებდნენ.

ბრალდებული მიმდინარე წლის 18 ივნისიდან, სისხლის სამართლის კოდექსის 223-ე პრიმა მუხლით გათვალისწინებული დანაშაულის ჩადენისათვის იძებნებოდა, რაც უკანონო ფორმირების შექმნას, ხელმძღვანელობას, ასეთ ფორმირებაში გაწევრებას, მონაწილეობას ან/და უკანონო ფორმირების სასარგებლოდ სხვა საქმიანობის განხორციელებას გულისხმობს. მას დაუსწრებლად წარედგინა ბრალი და სასამართლოს მიერ პატიმრობა შეეფარდა.