თბილისის მერი, დავით ნარმანია დღეს, 4 საათზე, საკრებულოში ოპოზიციის წარმომადგენლების მოთხოვნით რიგგარეშე სხდომაზე წარდგება.

თბილისის საკრებულოს წევრი, ალეკო ელისაშვილი აცხადებს, რომ დროა დავით ნარმანიამ მიიღოს საპასუხისმგებლო გადაწყვეტილება და თანამდებობა დატოვოს:

"ხანდახან მეჩვენება, რომ ელდარ შენგელაიამ ცისფერი მთები გადაიღო დავით ნარმანიაზე. 11 თვე დარჩა მერობის და ახლა აპირებ რეორგანიზაციას და ძალიან უხერხულია".

ოპოზიციის წრმომადგენლებს არ უერთდება ქართული ოცნების წევრი, გიორგი ტყემალაძე და განმარტავს, რომ სანამ გამოძიება არ დასრულდება, გადაწყვეტილებების მიღება არ იქნება სწორი.

თავად ნარმანია კი აცხადებს, რომ საკრებულოს წევრებთან გამწვანების და ეკოლოგიური საკითხების გარდა არაფრის განხილვას აპირებს.

შეხვედრა საპროტესტო აქციის ფონზე გაიმართება. არასამთავრობო სექტორი 14:30 საათზე საკრებულოს შენობასთან დავით ნარმანიას გადადგომის მოთხოვნით აქციას ჩაატარებს. მათი მთავარი მოთხოვნა მერის გადადგომა და რიგგარეშე არჩევნების ჩატარებაა.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

აღნიშნული ფაქტის გამო თბილისის მერიის ეკოლოგიის და გამწვანების სამსახურის უფროსისა და მისი მოადგილის გადადგმომის მოთხოვნით სამოქალაქო სექტორი, ოპოზიციის წარმომადგენლებთან ერთად, საპროტესტო აქციებს მართავს.

გარდა ამისა, საკრებულოს ოპოზიციამ დავით ნარმანია საკრებულოს რიგგარეშე სხდომაზე აღნიშნულ საკითხზე სასაუბროდ დაიბარა. ენმ-მ კი დედაქალაქის მერის გადადგომის მოთხოვნით ხელმოწერების შეგროვება გუშინდელი დღიდან დაიწყო.