შინაგან საქმეთა სამინისტროს მართლწესრიგის ოფიცრების პირველმა ნაკადმა დღეიდან, 4 დეკემბრიდან მუშაობა დაიწყო. ამ ეტაპზე ოფიცრები მხოლოდ თბილისის პოლიციის დეპარტამენტის ვაკე-საბურთალოს სამმართველოში იმუშავებენ.

შინაგან საქმეთა მინისტრის, გიორგიმ გახარიას განცხადებით, მართლწესრიგის ოფიცრები უნდა გახდნენ ხიდი უწყებას და საზოგადოებას შორის. მისივე თქმით, მათი მიზანი საზოგადოებაზე ზრუნვა და ნდობის დანერგვაა.

მართლწესრიგის ოფიცრების ინსტიტუტი შსს-ს სისტემური განახლების ფარგლებში შეიქმნა და უბნის ინსპექტორს ანაცვლებს. ოფიცრის კომპეტენციაში შედის არასრულწლოვნებთან, ოჯახში ძალადობასთან, სამეზობლო დავებთან, უკანონო მიგრაციასთან, მოწყვლად ჯგუფებთან დაკავშირებულ პრობლემებსა და გამოწვევებზე რეაგირება.

ოფიცრის ფუნქცია-მოვალეობებში, ასევე, შედის: დანაშაულის პრევენციაზე ორიენტირებული ღონისძიებების დაგეგმვა და განხორციელება, ინფორმაციის შეგროვება, სისტემატიზაცია და პირველადი დამუშავება, ადმინისტრაციული სამართალდარღვევების საქმეთა წარმოება, შესწრებულ დანაშაულზე რეაგირება.