სამხედრო პოლიციის ყოფილ უფროსს, მეგის ქარდავას უკრაინაში საექსტრადიციო პატიმრობა შინაპატიმრობით შეეცვალა. პროკურატურის სამართლებრივი უზრუნველყოფის დეპარტამენტის უფროსმა, ირაკლი ჩილინგარაშვილმა განმარტა, რომ ამასთან დაკავშირებით ქართულმა მხარემ უკრაინას თავის დროზე ყველა შესაბამისი მასალა მიაწოდა. მისივე თქმით, მეგის ქარდავა უკრაინაში პარალელურად თავშესაფარს ითხოვს.

უკრაინული კანონმდებლობის, თანახმად როდესაც პირი თავშესაფარს ითხოვს, მისი ექსტრადაციის საკითხის განხილვა ჩერდება და იუსტიციის სამინისტრო ელოდება საბოლოო გადაწყვეტილების მიღებას სანამ თავშესაფრის პროცედურები ამოიწურება. ასევე, უკრაინული კანონმდებლობის თანახმად საექსტრადაციო პატიმრობის მაქსიმალური ვადა ერთი წელია, რისი გასვლის შემდეგ პირი დაუყონებლივ უნდა გათავისუფლდეს პატიმრობიდან.

"ვინაიდან ლტოლვილობასთან და თავშესაფარის მინიჭების საკითხთან დაკავშირებით პროცედურები არ იყო დასრულებული, უკრაინის კომპეტენტურმა ორგანოებმა მეგის ქარდავა საპატიმრო დაწესებულებიდან გაათავისუფლეს და მის მიმართ გამოყენებულია შინაპატიმრობა", — განმარტა ირაკლი ჩილინგარაშვილმა

როგორც მან ჟურნალისტებთან განმარტა, ქარდავას მიმართ გამოყენებული შინაპატიმრობა გულისხმობს გარკვეული შეზღუდვების დაწესებას, მაგალითად გადაადგილებასთან დაკავშირებით. ასევე, აქვს ვალდებულება, საჭიროების შემთხვევაში გამოცხადდეს კონკრეტულ საგამოძიებო უწყებაში.

"ამის ერთადერთი მიზანი სწორედ ის იყო, რომ არ ამოწურულიყო საექსტრადიციო პატიმრობის ვადა სრულად და მას შემდეგ, რაც ლტოლვილობასთან, თავშესაფრის მინიჭების საკითხთან დაკავშირებით პროცედურები დასრულდება, უკრაინის იუსტიციის სამინისტროს შეეძლება ეს ადამიანი კვლავ აიყვანოს პატიმრობაში. აქედან გამომდინარე ერთადერთი მიზეზი მისი გათავისუფლების არის ის, რომ შემდგომში, როდესაც უკვე შესაძლებელი იქნება საექსტრადიციო პროცედურების განხილვა, ექსტრადიციის განმხილველ ორგანოს მიეცეს შესაძლებლობა, მეგის ქარდავა კვლავ აიყვანოს პტიმრობაში და უკვე სრულყოფილად განიხილოს მისი საქართველოში ექსტრადიციის საკითხი. სწორედ ეს იყო მიზეზი ქარდავას საექსტრადიციო პატიმრობიდან გათავისუფლების და მის მიმართ შინაპატიმრობის გამოყენების", — აღნიშნა სამართლებრივი უზრუნველყოფის დეპარტამენტის უფროსმა.

პროკურატურის განცხადებით, მეგის ქარდავა 11 სისხლის სამართლის საქმეზე ზოგ შემთხვევაში მსჯავრდებული, ზოგ შემთხვევაში კი ბრალდებულია.