პანკისის სპეცოპერაციის შედეგად გარდაცვლილი თემირლან მაჩალიკაშვილის მამა, მალხაზ მაჩალიკაშვილი გაერთიანებული ოპოზიციის აქციაზე სიტყვით გამოვიდა. პარლამენტის წინ საპროტესტო აქცია ამ წუთებში მიმდინარეობს.

"აქ დგანან ადამიანები, რომლებიც არ იყიდებიან", — ამ სიტყვებით მიმართა მაჩალიკაშვილმა რუსთაველის გამზირზე შეკრებილებს.

მალხაზ მაჩალიკაშვილის თქმით, მისთვის და ზაზა სარალიძისთვის დღევანდელი დღე ძალიან მძიმეა, ვინაიდან დღეს, 2 დეკემბერს ხორავას ქუჩაზე მოკლული დათო სარალიძის წლისთავია.

"მე იმ დღისა მეშინია, როცა გახდება თემირლანის წლისთავი. ვაითუ არ გაირკვა თემირლანის მკვლელობის ამბავი, სანამ 1 წელი გახდება, ვაითუ არ დაისჯებიან ის ადამიანები. მე სიმართლე გითხრათ, თქვენი იმედით მოვედი აქამდის", — განაცხადა მალხაზ მაჩალიკაშვილმა.

შვილმოკლულმა მამამ, ზაზა სარალიძეს აქციის მონაწილეებს გვერდში დგომისკენ მოუწოდა:

"ჩემი მტრის მტერი ჩემი მეგობარია. დღევანდელ დღეს ჩემს მოკლულ შვილთან ერთად მოკვდა საქართველოს ის ნაწილი, რომელმაც ტალახი გვესროლა და რომლებიც დღემდე იცავენ ჩვენი შვილების მკვლელებს კბილებით. მხოლოდ ერთს გთხოვთ ხალხო, სამართალმა უნდა იზეიმოს".

ამ წუთებში, თბილისის პარლამენტის შენობის წინ გაერთიანებული ოპოზიციის აქცია იმართება. რუსთაველის გამზირის საავტომობილო გზის ორივე მხარე გადაკეტილია. ოპოზიციის წევრები აცხადებენ, რომ ისინი არ ცნობენ საპრეზიდენტო არჩევნების შედეგებს და არ აღიარებენ სალომე ზურაბიშვილს პრეზიდენტად. მათი აზრით "ხმები მოიპარეს" და არჩევნები გაყალბდა. ისინი ვადამდელ საპარლამენტო არჩევნებს მოითხოვენ.