2019 წლის რაგბის მსოფლიო ჩემპიონატისთვის მზადება გადამწყვეტ ფაზაში შედის. იაპონია მონაწილე ქვეყნებს გრანდიოზულ დახვედრასა და გამორჩეულ მსოფლიო ჩემპიონატს ჰპირდება, რაც უკვე თვალსაჩინო გახდა. მსოფლიო ჩემპიონატის ერთ-ერთი მონაწილე ქვეყანა საქართველოცაა, რომელსაც Kumagaya-ს საშუალო სკოლის იაპონელმა მოსწავლეებმა ჰიმნიც კი მიუძღვნეს.

ვიდეო, რომელიც პირველად Youtube აიტვირთა, საქართველოში იაპონიის საელჩომ ფეისბუქის გვერდზე გაავრცელა.

"იაპონური მხარე ძალისხმევას არ იშურებს, რომ მონაწილე ქვეყნის კულტურა საკუთარ ქვეყანას გააცნონ", - ნათქვამია საელჩოს მიერ გავრცელებულ განცხადებაში.

იაპონელი მოსწავლეების მიერ შესრულებულ ჰიმნის შესახებ სკოლის ვებ-გვერდმა სპეციალური სტატიაც მოამზადა. სტატიაში წერია, რომ სკოლის მუსიკალური ჯგუფის ხელმძღვანელმა ჰიმნის მომზადებისას დიდი ძალისხმევა გაიღო, რათა შესრულება იდეალურთან მიახლოებული ყოფილიყო.

"თავიდან არ ვიცოდი, როგორ უნდა წარმოთქმულიყო სიტყვები სწორად, რადგან არანაირი სიახლოვე ამ ენასთან არ მქონია. შემდეგ დავიწყე სხვადასხვა ვიდეოების ყურება და მოსმენა, ბევრი ვიშრომეთ და ვფიქრობ, გამოგვივიდა. საქართველოს ჰიმნში ჩაქსოვილია მათი ტრადიცია და ისტორია, რაც ძალიან საინტერესო იყო. მოსწავლეები განუწყვეტლივ იმეორებდნენ სიტყვებს და მათი შინაარსის გაგებასაც ცდილობდნენ", - ამბობს ხელმძღვანელი ჰიროში საკურაი.

სტატიაში მოყვანილია მოსწავლეების კომენტარებიც, რომლებშიც ნათქვამია, რომ ისინი ჰიმნზე მუშაობამ საქართველოს კულტურასთან დაახლოვა.

ფოტო: ღუგბყ ჭორლდ

"როდესაც ვამზადებდით ჰიმნს, დავინტერესდი საქართველოს კულტურით და ის ძალიან ნაცნობი და ახლო გახდა ჩემთვის. იმედი მაქვს, რომ მსოფლიო ჩემპიონატის დაწყებისასაც მოგვეცემა ამ ჰიმნის შესრულების შესაძლებლობა", - ამბობენ მოსწავლეები.

საქართველოს რაგბის ეროვნული ნაკრები იაპონიაში გასამართ მსოფლიო ჩემპიონატზე მეოთხე კალათაშია განთავსებული, მისი მეტოქეები კი უელსის, ავსტალიის, ფიჯისა და ურუგვაის ნაკრებები იქნებიან.

საქართველი პირველ მატჩს 2019 წლის 23 სექტემბერს, უელსის ეროვნული ნაკრების წინააღმდეგ გამართავს.