გორის რაიონის სოფელ ზემო სობისში, ქართული მხარის მიერ კონტროლირებად ტერიტორიაზე, რუსული კომბაინი გამოჩნდა. კომბაინებმა მოსავლის აღება იმ ტერიტორიაზე დაიწყეს, რომელზეც მოსავალი ჯერ კიდევ გაზაფხულზე საქართველოს მოქალაქეებმა დათესეს.

ამ წუთებში მიმდებარე ტერიტორიაზე გორის მუნიციპალიტეტის გამგებელი, დავით ონიაშვილი და შერიგებისა და თანასწორობის საკითხებში სახელმწიფო მინისტრი, ქეთევან ციხელაშვილი იმყოფებიან.

On.ge გორის მუნიციპალიტეტის გამგებელს, დავით ონიაშვილი ესაუბრა, რომელმაც განმარტა, რომ რუსულმა მხარემ ტექნიკით შემოსვლა, ყოველგვარი გაფრთხილების გარეშე გუშინ, გვიან ღამით დაიწყო და მოქალაქეებს ამ ტერიტორიაზე შესვლის უფლება არ მისცა:

"ჩვეულებრივ ამ მოსახლეობამ თავისი ნაკვეთები მოხნა, დაფარცხა, დათესა. დათესვის შემდეგ, გაზაფხულზე, მათ მონიშნეს ტერიტორია ჯოხებით და ახლა შემოიყვანეს კომბაინები და ჩვენი მოსახლეობის მოსავალს იღებენ ამ კონკრეტულ ნაწილზე. ჩვენ რომ დილით გამოვჩნდით კომბაინები გავიდნენ."

დავით ონიაშვილი აცხადებს, რომ მიმდებარე ტერიტორიაზე მავთულხლართები არ არის და არც ტერიტორიის აღმნიშვნელი სტენდი დგას, მიწის ნაკვეთი მხოლოდ იმ ჯოხებით არის გამოყოფილი, რომლითაც რუსულმა მხარემ გაზაფხულზე ტერიტორია მონიშნა. ონიაშვილის თქმით, დღემდე მოსახლეობას მიწის ნაკვეთზე შესვლის არანაირი პრობლემა არ ჰქონია და არც რუსული მხარე ჩანდა.

ადგილობრივი გამგებლის განცხადებით, მომხდართან დაკავშირებით ყველა სახელისუფლებო უწყება ინფორმირებულია და კოორდინირებულად მუშაობს:

"მიმდინარეობს მუშაობა, რომ შედგეს იმ ტიპის მოლაპარაკება, რომ ხელი არ შეუშალონ ჩვენს მოსახლეობას და მათ საკუთარი ნათესების აღება შეძლონ."

2008 წლის აგვისტოს ომის შემდეგ, რუსული მხარე მცოცავ ოკუპაციას ახორციელებს საქართველოს მიერ კონტროლირებად ტერიტორიაზე. ე.წ საზღვრის გავლება ქართულ სოფლებში დაიწყო. მოსახლეობის ნაწილმა სახნავ-სათესი მიწები და სახლები დაკარგა. საოკუპაციო ხაზის გავლება აქამდე სოფელ ჯარიაშენში და ხურვალეთში მიმდინარეობდა.

მცოცავ ოკუპაციასთან დაკავშირებით გაკეთებულ განცხადებაში პრეზიდენტი, გიორგი მარგველაშვილი აღნიშნავს, რომ საქართველომ ტერიტორიული მთლიანობა დიპლომატიური გზით, შერიგებით და არა – სამხედრო მოქმედებებით უნდა აღადგინოს. პრეზიდენტმა აღნიშნა, რომ ოკუპაციას რუსეთის მხრიდან არანაირი ადეკვატური არგუმენტი არ აქვს და სადემარკაციო ხაზის გავლების პროცესი ალოგიკურია. მარგველაშვილის თქმით, ეს პროცესი მოლაპარაკების გზით უნდა გამოსწორდეს.

თუმცა, რუსული მხარე ოკუპაციას არ აღიარებს. წელს, თბილისში გამართულ ეუთოს საპარლამენტო ასამბლეაზე, რუსმა დეპუტატმა, ნიკოლაი კოვალიოვმა განაცხადა:

„რა თქმა უნდა, მხარს არ დავუჭერთ საქართველოს მოთხოვნებს. რუსეთს არ შეუძლია ოკუპაცია უწოდოს იმას, რაც ხდება. ყველაფერი რაც რუსეთმა გააკეთა, ნაკარნახევი იყო ერთადერთი სურვილით, გადაერჩინა ადამიანების სიცოცხლე“.