საქართველოს პრემიერ-მინისტრის, მამუკა ბახტაძის განცხადებით, საქართველო აღიარებულია, როგორც ყველაზე წარმატებული ქვეყანა ევროკავშირთან ინტეგრაციის გზაზე. ასე შეაფასა მამუკა ბახტაძემ ბრიუსელში გამართული მაღალი დონის შეხვედრა, ევროკომისრებსა და საქართველოს მთავრობის წევრს შორის, რომელსაც ევროკომისიის პრეზიდენტი ჟან-კლოდ იუნკერი და საქართველოს პრემიერ-მინისტრი, მამუკა ბახტაძე ხელმძღვანელოდნენ.

პრემიერის თქმით, ევროპელმა პარტნიორებმა სწორედ საქართველოს შესთავაზეს ეს უნიკალური პლატფორმა. ბახტაძემ აღნიშნა, რომ უმაღლესი დონის ფორმატის პირველ შეხვედრაზე, რომელსაც პრეზიდენტ იუნკერთან ერთად პრაქტიკულად ყველა ევროკომისარი ესწრებოდა, კიდევ ერთხელ გაანალიზდა, რა უნდა გაკეთდეს ყველა მიმართულებით, რათა საქართველო კიდევ უფრო დაუახლოვდეს ევროპას.

"ჩვენ მივიღეთ ძალიან მნიშვნელოვანი შედეგები. ჩვენ ძალიან მნიშვნელოვან დახმარებას მივიღებთ იმისთვის, რომ საქართველოდან ევროკავშირის ბაზარზე ექსპორტი გაიზარდოს. ეს შეეხება მცირე და საშუალო მეწარმეებს. ძალიან მნიშვნელოვანი ნაბიჯია გადადგმული ამ თვალსაზრისით, განსაკუთრებით იმის გათვალისწინებით, რომ ჩვენ აბსოლუტურ პრიორიტეტად დავისახეთ საქართველოში სიღარიბის დამარცხება და ევროკავშირი ამ ძალიან მნიშვნელოვანი პრობლემის გადაჭრაში ჩვენს გვერდით არის", — განაცხადა პრემიერმა.

მისი თქმით, მეორე საკითხი განათლების სისტემასა და ქართველ სტუდენტებს ეხებათ.

"მიღებულია გადაწყვეტილება და გვექნება რამდენიმე პლატფორმა, რომელიც ქართველ სტუდენტებს ევროკავშირის ქვეყნებში განათლების მიღებას კიდევ უფრო გაუმარტივებს. ევროკავშირი დადგება ჩვენს გვერდით ყველაზე მნიშვნელოვან რეფორმაში - ეს არის განათლების სისტემის რეფორმა. ჩვენ გვექნება მხარდაჭერა მწვანე ეკონომიკის ინიციატივაში", — განაცხადა მამუკა ბახტაძემ.

პრემიერის ინფორმაციით, ამასთან ერთად, განხილული იყო შესაძლებლობები, რომ საქართველომ მიიღოს დამატებითი დახმარება სოციალური პოლიტიკის გაუმჯობესების, ბევრ სფეროში ახალი სამართლებრივი ჩარჩოს შექმნის მიმართულებით და ამ საკითხშიც ევროკავშირი საქართველოს გვერდით იქნება.

"მოკლე რეზიუმე რომ გავაკეთოთ, ეს არის მომავალი საქართველოს განვითარების გეგმა, ისეთი საქართველოსი, რომელიც თითოეულ ჩვენგანს გვინდა გვქონდეს და მივაღწიოთ ჩვენს სანუკვარ მიზანს - საქართველო გავხადოთ ევროკავშირის სრულფასოვანი წევრი. სწორედ ამ მიზნისკენ გადაიდგა დღეს ძალიან მნიშვნელოვანი ნაბიჯი და მინდა, ჩვენს თითოეულ მოქალაქეს მივულოცო დღევანდელი დღე", — განაცხადა მთავრობის მეთაურმა ბრიუსელში ქართველ ჟურნალისტებთან საუბრისას.